Ginang gidunggab sa selosong bana

CEBU - Nalandig sa tambalanan ang usa ka asawa human kini unaya sa pagdunggab sa iyang bana gamit ang kutsilyo tungod sa selos niadtong Martes sa gabii diha sa barangay Lawaan III, dakbayan sa Talisay.

Ang biktima giila sa mga polis nga si Josephine Barliso, 37, residente sa nahisgutang lugar kinsa nakaangkon og samad dinunggaban sa tuong bahin sa lawas ug walang bukton.

Ang anak sa magtiayon mao nay midala kaniya ngadto sa Talisay City District Hospital apan tungod sa kahimtang niini gibalhin sa Vicente Sotto Memorial Medical Center.

Ang suspetsado nga si Raul Barliso, 38, padayon pang gipangita sa kapolisan tungod kay nakaikyas kini human sa pagpanunggab.

Base sa imbestigasyon ni PO3 Joel Rosales si Josephine natulog diha sulod sa ilang balay apan kalit lang kining nakamata dihang kalit misakit ang iyang lawas.

Mao nalay iyang namat-an nga naggunit ang iyang bana sa kutsilyo maong iyaha kining gikuptan apan mihana hinuon og usab og dunggab ang suspek kaniya maong misinggit nalang siya pagpangayo og tabang sa mga kabanay ug silingan.

Sa kahadlok sa suspek nga madakpan nagdali kini og ikyas ug wala na mopakita sa ilang balay.

Nasayran nga estambay si Raul tungod kay wala kini permanenteng trabaho ug ang asawa niini ang misulod isip katabang sa ilang silingan.

Si Raul ang gikatahong magsige og selos sa iyang asawa ug kanunay kini niyang baharan nga patyon.

Gikataho usab nga ang nahisgutang magtiayon ang kanunay’ng mag-away tungod sa pagkasugarol sa suspetsado ug pagkaseloso ug kung mahubog kini magmaoy ug mamun-og sa iyang asawa ug mga anak.

Usa sa mga silingan sa duha kinsa nagdumili sa pagpabutyag sa iyang ngalan nagkanayon nga niadtong tuig 2006 ug 2007 nag-atubangay ang magtiayon diha sa ilang barangay ug nagkasinabot nga wala na silay hilabtanay sa usa’g-usa kanila. (Brenda Batuto)   (BANAT NEWS)