USA patay sa lunop sa Bohol

CEBU - Usa ang kumpirmadong patay sa paglunop sa baha bunga sa pagsige og ulan sa probinsya sa Bohol diin upat ka mga lungsod ang gikatahong naapektahan kagahapon.

Ang disaster action officer sa lungsod sa Clarin nga si konsehal Isidro Arsiles sa pakighinabi sa Banat News sa telepono kagahapon mibutyag nga ang nakalas mao si Ebaristo “Titing” Ramos samtang padayon pang gipangita ang apo niining si Harold kinsa gikahadlukang naapil og kaanod.

Si Ramos nakit-an nalang nga nasangit sa mga gapnod pipila ka metros gikan sa iyang nabanlas nga balay.

Matud pang Arsiles gibanlas ang balay sa mga biktima diha sa sitio Caugnay sa barangay Poblacion Centro sa ilang lungsod nga nahimutang luyo sa merkado publiko dihang mi-overflow ang Sumaquid River sa ilang duol.

Gawas sa maong suba mi-overflow usab ang Bacani River diha sa barangay Bacani hinungdan nga ang naapektahang barangay miabot ngadto sa Candahic; Bonbon, Poblacion Norte diin mahimutang ang munisipyo, Tamaran ug Bacani.

Gawas sa kinabuhi ug kabalayan, nangalumos usab ang mga kahumayan daplin sa nahisgutang mga suba ilabi na diha sa barangay Mataob ug Cumaang.

“Abot sa hawak ang tubig, ang trak gani sa munisipyo wala makalahos tungod sa tubig,” sumala pang Arsiles ug midugang nga nagsugod ang hinay apan kanunay nga pagbunok sa ulan kagahapon sa kaadlawon hangtud na sa kabuntagon.

Sumala pa niya bisan kadtong mga panimalay nga ginama sa hollowblocks gipang-anod gihapon apan wala pa gyud matino kun pila ka balay ang nangaguba ug uban pang danyos atol ning pagsulat sa balita.

Ang mga naapektuhan sa pagbaha sa lalawigan sa Bohol mao ang lungsod sa Clarin, Inabanga, Tubigon ug Loon diin molapas sa tuhod ang tubig baha sa maong mga lugar.

Samtang si Konsehal Marlon Amila, ang action officer sa Tubigon nga gihinabi sa Banat News sa telepono mitug-an nga dunay nahitabong mga landslides sa duha ka barangay sa Talengeras ug Kawayanan.

Nangatabunan sa midahiling yuta ug di pa maagian ang mga provincial roads padulong sa nahisgutang barangay tungod sa pagbunok sa ulan sugod kagahapon sa kaadlawon.

Samtang sa coastal barangays, dunay mga seawalls ug mga paril ang nangahugno tungod gihapon sa baha ilabi na daplin sa dagat ang barangay Centro sa sitio Ingod, barangay Tinangnan ug Macaas.

Dunay mga kahoy nga nangaibot, kahumayang gilunupan ug hayopang nangamatay sa pagkalumos.

Ang mga residente gipahimangnoan sa pagbiya sa ilang mga balay ug mangita og mas luwas nga panimalay kun mokusog ug mosaka pa og maayo ang tubig apan sagad kanila nagdumili sa pagsunod sa maong pahimangno.

Si Mayor Hermogenes Dizon sa Clarin Bohol nga gikahinabi sa dySS Super Radyo Cebu nagkanayon nga dali nilang gipahikling ang mga naapektuhang residente sa mga tunghaan sa ilang lungsod dungan sa pagpang-apod-apod og mga relief goods ngadto sa mga biktima.

Si Chief Inspector Wayne Magbanua sa police station sa lungsod sa Tubigon, mibutyag nga nilapaw gyud ang tubig sa ilang suba gumikan usab sa kadaghang kahoy nga nangasangit ug nakabara sa tubig.

Apan gitataw niini nga wala pa silay nadawat nga report kabahin sa mga na-missing o kaha naangol nga mga sibilyan diha sa ilang lungsud tungod sa maong baha mugna sa kusog nga pag-uwan.

Subay niini ang mga kadagkuan sa Regional Disaster Coordinating Council (RDCC)-7 nagpaabot pa karon sa report sa mga opisyal sa maong mga lugar labot na sa danyos sa mga pananom ingon man mga imprastraktura.

Si Florenda Gaviola ang Office of Civil Defense -7 mitug-an sa Banat News nga mipagawas na sila og pahimangno sa tanang action officers ug disaster managers sa rehiyon kabahin sa peligro dinala sa pag-ulan.

“Our advise to the public is they must be vigilant labi na sa mga nagpuyo sa low lying areas, kanang duol sa suba ug sa bukid tungod sa danger sa pag-overflow ug sa landslide,” sumala pang Gaviola. (Uban sa report ni Edwin Ian Melecio) (BANAT NEWS)