Kapitolyo naglaslas og kawani

Giangkon ni Governor Gwendolyn Garcia nga iyang gilaslasan ang gidaghanon sa mga kawani sa Kapitolyo niining tuig 2008 aron makamenus sa gastos ang kagamhanan sa probinsiya sa Sugbu.

 Matud pa ni Garcia nga 30 porsiyento ang pagkunhod sa mga empleyado sa probinsiya karon tuiga gikan sa 1,844 sa tuig 2007 ngadto na sa 1,670 niining tuiga, apan sagad kanila mga edaran na.

 Ang gobernadora nagkanayon nga iyang gitanyagan og early retirement plans ang mga edad-edaran nang mga empleyado ug wala nay gipuli kanila.

Gawas niini, agresibo usab nga gipatuman sa Kapitolyo ang "outsourcing program" diin ang mga manpower agencies na ang gikontrata sa Kapitolyo alang sa pipila ka mga serbisyo sa probinsiya.

 Ang gobernadora miingon nga nakamenus og 39 porsiyento sa expenses ang probinsiya niining maong sistemaha.

 "Walay laing LGU dinhi sa Sugbu ug sa nasud nga may 20 porsiyentong Personnel Services sa budget," matud pa ni Garcia.

 Wala hinuon motumbok ang gobernador kun sa sunod tuig ipadayon ba gihapon niya ang paglaslas sa gidaghanon sa mga regular nga kawani sa Kapitolyo.