Stall sa pabuto, napiksa'g welding miulbo

Miulbo ang usa ka stall nga puno sa mga paninda nga lain-laing klase sa mga pabuto human mapiksi og baga gikan sa nagpahigayon og welding kilid nga bahin   sa sports complex sa lungsod sa Argao niadtong Lunes sa alas 3:30 sa hapon.

Ang kapolisan sa lungsod sa Argao mibanabana sa kinatibuk-ang danyos sa tanang mga pabuto nga nahurot og kaugdaw nga mokabat sa P75 mil gikan sa mga rebentador, kwitis, fountain ug uban pa.

Gibutyag ni PO1 Eva Caminade sa Argao Police Station sa dihang nahinabi sa Banat News ang maong stall nahimutang sa kilid nga bahin sa Diosdado Macapagal Sports and Cultural Complex sa barangay Poblacion nga gipanag-iya sa usa ka Efren Cinco, 49, minyo ug molupyo sa nahisgutang lugar.

Subay sa inisyal nga imbestigasyon sa kapolisan nasuta nga samtang nagkalingaw sa pagpamaligya og lainlaing klase sa mga pabuto ang tag-iya duna usa'y nagpahigayon og welding sa ibabaw nga bahin sa maong complex.

Nahitabo nga dunay pinisik nga baga gikan sa welding rod ug didto motugpa sa stall ni Cinco nga maoy gibutangan sa mga firecrackers hinungdan nga nahurot og kabuto ang tanang baligya niini apil na ang mga fountain nga nakahatag og kabalaka sa mga sikbit nga mga stall.

Hinuon dali nga nakaresponde ang mga sakop sa kabomberohan sa Argao ug napawong dayon ang kalayo ug wala na makakatap ang sunog sa sikbit nga mga stall ug wala say naangol atol sa maong panghitabo.