2 ka tawo gipang-ambush sa Lawaan I

CEBU - Duha ka mga tawo ang namatay sa dihang giatngan ang ilang gisakyan nga motorsiklo ug gipamusil sa ilang gikalalis sa ilang paghunong didto sa barangay Lawaan-I siyudad sa Talisay niadtong Sabado sa alas 9:45 sa gabii.

Ang mga biktima mao sila si Lemuel Depairine, 36, minyo ug kauban niini nga si Roger Oraccion, 37, minyo ug pulos molupyo sa nahisgutang lugar.

Samtang ang suspek mao si Eulogio Pansoy Jr., 33, nagpuyo sa UP Lot Lawaan-1 ug kauban niini nga giila lang sa pangalan nga Junel.

Matud ni SPO3 Cleofas Bonjoc sa Talisay City Police Station sa dihang nahinabi sa Banat News nga ang mga biktima nagsakay   og motorsiklo nga gimaniho ni Lemuel ug pag-abot nila sa nahisgutang lugar   gipara kini sa suspek hinungdan nga mihunong kini ug gi-parking ang ilang motorsiklo ug gikonprontasi ang mga suspek.

Apan sa tanto nilang panaglalis nagkainitay kini og dayon mideretso og bunot sa armas si Pansoy dayong pusil sa mga biktima sa makadaghang higayon ug pagkahuman yano ra kaayong nanglakaw ang mga suspek paingon sa South Road Properties (SRP).

Apan daling nakatawag og polis ang mga tawo sa lugar ug sa pag-responde sa Task Force Motorsiklo pinangulohan ni PO3 Loi Alalim, nasugatan niini sa dalan ang mga suspek apan misukol kini ug namusil sa dihang gimanduan nga pa-surenderon ug dayung abtik nga milayat sa semento nga pader sa BF homes dayong sibat pahilayo.

Samtang ang mga biktima gidali pagdala sa Talisay City District Hospital apan gideklarar sa mga doktor nga dead on arrival si Oraccion human makaangkon og duha ka samad pinusilan sa tiyan ug ang kauban niini nga si Depairine gi-transfer sab dayun sa tambalanan dinhi sa dakbayan sa Sugbu apan matud ni SPO3 Bonjoc iyang nasayran gikan sa mga kabanay niini nga mibisita sa police station kagahapon sa udto nga namatay usab sulod sa tambalanan si Depairine.

Samtang nasikop atol sa gipahigayong hot pursuit operation sa kapolisan pinangulohan sa hepe nga si Supt. Henry Biñas ang suspek nga si Pansoy ug na-recover gikan sa iyang posesyon ang kalibre .38 nga dunay lima ka kabhang sa bala sulod sa cylinder niini nga gibalhog na karon sa detention cell samtang nagpaabot sa kasong ipasaka niini.

Samtang padayon pa karong gipangita sa kapolisan ang usa ka “June” nga kauban sa suspek.   (BANAT NEWS)