Bangi ni Cortes ug Fortuna, katawhan naapektahan

CEBU - Susama sa bitin kun halas, kun ang ulo maoy magsalimuang ang tibuok kalawasan maoy maapektahan. Kini susama ra sa nahitabo sa dakbayan sa Mandaue sa pamunoan nila ni Mayor Jonas Cortes ug Bise Mayor Carlo Fortuna sa tuig 2008.

Gumikan sa panagbangi sa duha, apektado ang serbisyo publiko sa tanang sektor lakip na ang performance sa mga departamento sa dakbayan ug sa Mandaue City Police Office.

Niining tuiga misaka og maayo ang krimen sa dakbayan sa Mandaue nga miresulta sa pagpalagpot kang Sr. Supt. Rodel Calungsod isip direktor sa kapolisan sa maong dakbayan.

Gitangtang ni Cortes si Calungsod sa katungdanan niadtong Septiyembre nga pipila nalang ka semana aron unta siya mag-usa ka tuig sa MCPO.

Si Calungsod miasumir niadtong Oktobre 19, 2007 hulip kang Sr. Supt.Alexander Abadinas.

Gibasol sa kapolisan ang pagsaka sa krimen sa dakbayan tungod sa problema sa mga fraternities ug gangs nga mikalas na og daghang kinabuhi dugangan pa sa nagkagrabeng mga kaso sa tulis, labni ug kawat nga binuhatan sa mga armadong mga tawo nga magsakay og motorsiklo.

Sa administrasyon usab gihapon ni Calungsod nadiskubrehan ang mga “cartoon girls” kon mga babayeng makighilawas sa mga lalaking kustomer nga maghapin lamang og karton diha sa reclamation area.

Hinuon ang maong opisyal sa maabot sa iyang gahum naninguhang mamenusan ang krimen sa iyang hurisdiksyon ug mipatuman og nagkalain-laing kampanya kontra krimen.

Kini bisan paman sa kakulang sa sakyanan sa kapolisan aron magamit sa pagpatrolya pagpatunhay sa kahapsay ug kalinaw, diha magkaproblema ang MCPO bahin sa sakyanan tungod sa panagsungi ni Cortes ug Fortuna.

Usa sa mga malampusong nahimo ni Calungsod sa MCPO mao ang malinawong pag-takeover sa Mandaue City College subay sa kamandoan ni Cortes gikan sa presidente sa maong tunghaan nga si Dr. Paulus Cañete sa Ibabao, Estancia.

Nahimong duha na ang Mandaue City College nga kini naglangkob sa gidumala ni Cañete ug ni Dr. Susana Cabahug nga maoy gitudlo sa mayor isip caretaker nga nagpahigayon sa ilang pagklase ang mga tinun-an sa Mandaue City Sports and Cultural Complex sa maong dakbayan ug karon naa nay klase sa Eversly Child Sanitarium Hospital sa barangay Jagobiao sa maong dakbayan.

Si 6th District Representative Nerissa Soon-Ruiz maoy gisandigan nila ni Cañete nga maoy hinungdan nga nagpadayon ang pagtungha sa mga tinun-an sa maong tulunghaan sa edipisyo nga ilang gibalhinan.

Nisamot hinuon ang gubot dihang giaresto si Cañete nila ni Supt. Vicente Mersan Premne sa pasangil nga nagdala kini og armas ug nagplano sa pagkutlo sa kinabuhi sa mayor ug pagsunog sa MCC, kining tanan hugtanong gipanghimakak ni Cañete.

Samtang nag-atubang og problema ang MCC, duna say isyung mitumaw diha sa Konseho kabahin sa gahin sa pundo alang sa maong tunghaan.

Dugang sa isyung mitumaw sa konseho mao ang supplemental budget nga gitumong alang sa suweldo sa mga job orders tungod sa giingong presensya sa mga ‘ghost employees.’

Tungod niini gimugna ang “Ghost Buster Station” kini aron masubay ang matag usa ka kawani kung tinuod ba silang nanarbaho sa city hall, apan taliwala sa maong isyu diha usab naukay ang kabahin sa mga kabanay sa mayor nga naghupot og mga vital positions sa mga departamento sa city hall.

Kini gitawag nga “Kabanay Unlimited” sa kampo ni Fortuna apan wala kini ikahimuot sa mayor kinsa sa iyang bahin mibutyag usab nga ang mga kanhi administrasyon nihimo sad niini ug hasta kaparyentihan ni Fortuna nabulahan.

Nunot niining panagbangi sa mga opisyal sa Mandaue, di ikalimod nga hasta ang basic services sa city hall sa publiko naapektahan og maoy hinungdan nga misaka ang krimen, dugay ang sweldo sa mga kawani, imprastraktura ug uban pa.

Tungod niini gipatawag ni Gobernador Gwendolyn Garcia ang duha ug gitambagan sa paghunong sa ilang pagbinayloay og mga dautang mga pulong nga makabungkag na hinuon sa iyang gipalambong kahiusahan sa lalawigan.   (BANAT NEWS)