Lasbag nanghagis priso

CEBU – Usa ka tawong lasbag napaslak sa prisohan kay nanghagis sa iyang mga silingan ug nangulata sa iyang mga silingan didto sa barangay Paknaan, dakbayan sa Mandaue niadtong Sabado sa gabii.

Ang gipriso sa kapolisan ug malagmit adto mamag-ong tuig sa bilanggoan mao si Edeladio Castroverde, 55, minyo, nga taga Poblacion, Tabogon, Cebu apan kasamtangang nagpuyo sa barangay Paknaan.

Si SPO1 Robert Hugo sa Presinto 3 sa Basak Police Station mibutyag sa Banat News nga nadawat nila ang reklamo sa mga silingan nga giingong gihasi sa suspetsado busa dali nila kining girespondihan.

Sa ilang pag-abot sa maong lugar didto na sa panimalay niini hiabti ang suspetsado nga puwerting huboga ug gipatay-patay na'g kulata ang iyang asawa hinungdan nga puwerting bun-oga sa naulahi.

Dali nga gisignit sa kapolisan si Castroverde ug ang asawa nga si Laura gipakuyog usab nila sa Mandaue City District Hospital ug gipasusi ang panglawas sa biktima, ingon man ang kahimtang sa iyang bana.

Sa gihimong pakisusi sa mga doktor  nasuta nga ang suspetsado nalurong sa ilimnong makahubog samtang ang asawa nahiagom sa grabeng bun-og sa nagkalainlaing dapit sa lawas.

Matud pa ni SPO1 Hugo nga magpabilin sa sulod sa ilang detention cell ang suspetsado hangtod sa Enero 5, 2009.

Apan kun ipadayon sa iyang asawa ug mga silingan ang pagpasaka og kiha kaniya, may dakong kalagmitan nga dugay pa kining makagawas gikan sa prisohan. ­–BANAT NEWS