BOC may skeletal force bisan holiday

CEBU – Aduna gihapoy operasyon ang buhatan sa Bureau of Customs dinhi sa Sugbu bisan pa kung gideklarar nga special non-working holidays sa presidente sa nasud.

Kini ang gipadayag ni Cebu Customs Chief of Staff Necomedic Cariño atol sa pakighinabi sa Banat News.

Matud pa ni Cariño, nakigtagbo ug nagkauyon ang mga department heads ug sa mga tagdumala sa Landbank of the Philippines uban ni Cebu Customs District Collector Ricardo Belmonte nga dunay ipabiling skeletal force sa tanang mga departamento.

Kini aron di maputol ang transaksiyon sa mga imports ug exports sa adwana nga dako og matabang sa panudlanan sa nasud gikan sa mga buhis nga makolekta gikan niini.

Nasuta usab nga dunay transaksiyon sa BOC-POC ug sa Landbank sa umaabot nga petsa 29 ug 30 sa Disyembre ug sa petsa 2 sa Enero tuig 2009 sa tanang mga import ug export nga kargamento sa Customs.

Naglaom ang customs nga mas motaas pa sa ilang target collections ang ilang makuha sa 2009 nga P6 bilyones. ­–BANAT NEWS