CEBU – Usa ka batan-ong lalaking naghatud sa iyang uyab pauli gikan nga nanuroy ang gipusil diha sa barangay Cahumayhumayan siyudad sa Danao niadtong Sabado sa alas 11:30 sa gabii.
Ang biktima nga anaa karun sa talandugon nga kahimtang mao si Junrey Manco Durano, 20, walay klarong trabaho ug molupyo sa nahisgutang lugar.
Samtang duha ka wala mailhing mga lalaki ang gitumbok nga maoy responsable sa krimen kinsa daling nakaikyas human sa hitabo.
Matud ni SPO4 Teofilo Deguilmo sa Danao City Police dihang nahinabi sa Banat News, nag-uban ang biktima ug sa iyang hinigugma nga naglakaw sa dalan dihang gisundan sa duha ka mga lalaki.
Pag-abot sa ngitngit nga bahin kalit kining gipusil sa duha diha sa tiyan nga nilapos ngadto sa bukobuko , tungod sa kahadlok sa uyab misutoy kini og dagan ug nagpakitabang sa mga tawo.
Tungod niini daling mikaratel og panagan ang mga mamumuno ug wala na maabti sa mirespondeng mga polis.
Ang biktima gidala sa Danao District Hospital apan gibalhin kini sa usa sa mga tambalanan sa Sugbu.
Ang kapulisan padayun pang nag-imbestigar pagtumbok sa mga suspek ug sa motibo sa krimen, usa sa ilang gisubay karon mao ang posibilidad nga gisuyaan ang biktima. –BANAT NEWS