Giunay'g dunggab sa ig-agaw

CEBU – Kritikal ang kahimtang sa usa ka mag-uuma human kini giunay og dunggab sa iyang kaugalingong ig-agaw atol sa ilang panaglalis sa inoman didto sa barangay Dungga siyudad sa Danao kagahapon sa alas 3 sa kaadlawon.

Ang biktima mao si Demostenes Perez Gian, 53, usa ka mag-uuma, ug molupyo sa nahisgutang lugar samtang ang suspek mao ra ang iyang kaugalingong ig-agaw nga si Lito Perez.

Matud ni SPO4 Tefilo Deguilmo sa Danao City police dihang nahinabi sa Banat News nag-inom ang biktima ug suspek gikan pa nianang sayong gabii apan sa tanto nilang panag-inom niabot kini sa init nga panaglalis.

Wala makaagwanta ang suspek sa ilang lalis ug nikuha og kutsilyo dayung gidunggab ang biktima sa tiyan ug nagdali sa pagsibat palayo sa lugar.

Ang mga kabanay ug silingan na sa biktima maoy nitabang niini ug nihatud sa Danao City District Hospital apan gibalhin sa Vicente Sotto Memorial Medical Center (VSMMC).

Apan nianang pagkaudto kagahapon boluntaryong mitahan ang suspek ngadto sa mga opisyal sa barangay ug gi-turn-over sa kapulisan. ­–BANAT NEWS