Pagdaghan sa walay trabaho gibalaka

CEBU – Nabalaka karon si Konsehal Edgardo Labella nga modaghan pa ang mga Pilipino lakip na sa mga Sugbuanon nga mawad-an og trabaho sa umaabot nga tuig.

Kini tungod usab sa giatubang ug padayong nasinati nga “financial crisis” sa tibuok kalibutan nga naglakip sa Pilipinas karon.

Gani niini lang tuiga, ubay-ubay na sa mga Overseas Filipino Workers (OFW) ang gipapauli sa ilang mga employer tungod sa nasinating krisis.

Gipaabot nga sa sunod tuig, dugang mga OFW ang papaulion sa ilang mga employer kun magpadayon ang paghagsa sa ilang mga negosyo.

Ang maong mga OFW gipaabot nga mahadugang sa taas nang daan nga “unemployment rate’’ sa nasud kung kini dili mapangandaman sa gobyerno.

Wala pay labot niini ang kaliboan usab ka trabahante nga gipanaktak sa pipila ka mga kompaniya dinhi sa nasud nga naapektuhan sa global financial crisis.

Tungod niini giawhag ni Konsehal Labella ang Department of Labor and Employment (DOLE) nga mumugna og mga programa nga magdala og mga trabaho.

Sa susamang kalamboan gipasalig sa kagamhanan sa dakbayan nga tabangan niini ang mga Sugbuanon aron makakita og maayong trabaho ubos sa kondisyon nga kinahanglang mopaubos sila sa gitanyag nga libreng skills training diha sa Department of Manpower Development and Placement (DMDP).

Ang chairman sa committee on labor and employment sa konseho nga si Konsehal Eduardo Rama Jr. nagkanayon nga gawas sa skills training sa DMDP nagpadayon usab ang livelihood program sa City government ingon man ang gipasiugdahan niining entrepreneurial activities. ­–BANAT NEWS