Kano gitulis, gipusil

CEBU – Usa ka kaslunong Amerikano sa usa ka Cebuana ang gipusil sa usa sa tulo ka tulisang mitulis kanila diha sa usa ka convenient store sa dalan F. Cabahug, sa barangay Mabolo ning dakbayan kagahapon sa alas 6:00 sa buntag.

Ang napusilan mao si Tim Timmerman, 31, lumad nga taga Chicago Illinois, USA uban sa iyang mga kabanay nga sila si Andrew Preston, 32, lumad usab nga taga 7820 Livingstone Avenue,Wgutose, WI ug Tammy Timmerman, lumad nga taga Wisconsin Dells,WI nga igsuon ni Timmerman.

Si Timmerman maoy napusilan sa tiyan ug nadala dayon sa Perpetual Soccour Hospital human niya gukda ang nangiskapong mga tulisan diha sa taxi nga ilaha untang sakyan.

Wala hinuon maka-enjoy ang mga tulisan sa ilang tinulisan human sila matultuli sa mga polis ug nangadakpan  sila si Carlo Villarin, 32, taga sitio Santa Lucia, barangay Kasambagan; Christian Dawal, 19, taga sitio Villa Aurora, sa Kasambagan gihapon ug Roy Rabaca, silingan ni Dawal.

Matud pang Sr. Insp. Michael Anthony Bastes, hepe sa Theft and Robbery Section sa Banat News, mao pay pag-abot sa mga biktima gikan sa Estados Unidos kuyog ang pamilya sa mga Timmerman ug sa babayeng iyang pangasaw-unon karong bulan sa Enero.

Apan nagkasabot silang manginom og bino diha sa usa ka convenient store sa nahisgutang dapit niadtong tungura dihang kalit nga nangabot ang mga suspek dayong tion og armas sa tulo ug mideklarar og hold-up.

Tungod sa kakalit, wala makaugpo ang mga langyaw samtang girekisa sa duha ang ilang mga lawas, ang ikatulong tulisan gikatahong nagtion kanila sa armas.

Nakuha gikan kang Timmerman mao ang usa ka Sony Cyber Shot Camera nga nagkantidad og 200 dolyares; samtang nakuha gikan sa mga kamot ni Preston ang usa ka HD Canon Vixia, HF100 Camcorder nga nagkantidad og 900 dolyares.

Sumala pa ni Bastes, daling miikyas ang mga suspek apan ang taxi driver nga ilang gipara ug gitiunan og armas kalit nga midagan hinungdan nga naabtan ni Timmerman ang tulo, diha-diha gipusil si Timmerman sa usa.

Ang mga suspek daling miikyas agi sa kawayanan ug kakugnan apan naabtan sa mga sakop sa Mobile Patrol Group diha na sa sitio Paray, Barangay Kasambagan pipila ka takna ang nakalabay.

Nasakmit og balik sa kapolisan ang mga butang sa mga langyaw lakip na ang drug paraphernalia ug ang paltik .38 rebolber nga may upat ka kabhang sa bala. ­–BANAT NEWS