Gipatay sa kanhi kapuyo sa babaye

CEBU - Patay diha-diha ang usa ka lalaki human kini dunggaba sa kanhi kapuyo sa iyang kapuyong babaye diha sa barangay Ibabao lungsod sa Cordova atol sa pagsaulog sa Pasko.

Ang biktima mao si Joel Mahinay, 19, residente sa maong dapit ug lumad kini sa lalawigan sa Masbate samtang ang midunggab kaniya mao si Alexander Agusto, 20, residente sa barangay Babag II dakbayan sa Lapulapu ug usa ka wala mailhing lalaki.

Matud pa ni PO2 Calixto Butantan sa Cordova Police Station, si Agusto maoy unang kapuyo ni Everly Chico ug sa maong panahon nagkaanak ang duha.

Ang maong babaye mabdos na usab og tulo ka bulan sa anak sa biktima.

Si Agusto uban sa iyang higala gikatahong misulong sa panimalay ni Mahinay ug sa dihang nagkita kini kalit nila kining gisukmag, gikulata ug gidunggab upat ka higayon diha sa dughan hinungdan sa hinanaling kamatayon niini.

Human sa maong insidente daling nisibat ang mga suspek, dako ang pagtuo sa kapolisan nga pangabubho ang motibo sa pagdunggab-patay kang Mahinay. (BANAT NEWS)