Sunog sa Pasko; P2.9M danyos

Moabot sa P2.9 milyones ang danyos nga gibilin sa sunog nga miigo sa duha sa mga lugar sa dakbayan sa Mandaue niadtong milabay’ng gabii atol sa pagsaulog sa Pasko.

Unang alarmang girespondihan sa mga sakop sa Mandaue City Fire Department mga alas 11:40 sa gabii niadtong Disyembre 23 mao ang sunog nga miigo sa The L’RIH Enterprising Corporation nga gipanag-iya ni Larry Ting diha sa may Cabancalan Road.

Samtang niadtong lapas sa alas 12 sa kagabhion atol sa Pasko usa ka “kuwitis” ang matud pa miigo sa atop sa Ring Wings warehouse diin liboan ka mga tissue papers ang gipanagoan ang naugdaw sa kalayo.

Si Mandaue City fire marshall Oscar Mayol nagkanayon nga nagpadayon pa karon ang ilang pag-imbestigar sa maong mga sunog diin matud pa ang nakaingon niini ang pagpataka og pabuto.

Matud pa nga ang sunog sa L’RIH   nadawat sa kabomberohan mga alas 11:40 sa kagabhion niadtong Disyembre 23 ug nabutang sa 3rd alarm human pipila ka mga silinganang establisamento niini   nabutang sa pilegro.

“Dali ra kaayo kay pulos man mga lumber ang naa sa sud sa yarda pero suwerte ang ubang establisamento kay dunay firewall maong wala sila ma unsa,” sumala pa ni Mayol.

Nasayran nga ang mga kasikbit nga mga establisamento sa nasunogan mao ang Patts badminton court, opisina sa usa ka Dr. Remedio ug ang coffee shop.

Ang tag-iya nga si Larry Ting mi-collapse, sa dihang nahibaw-an niini nga ang iyang lumber yard naugdaw sa hingpit diin ang kalayo nakontrolar sulod sa usa ka oras.

Usa ka empleyado ni Ting nga wala mailhi gikataho   nga napaso sa iyang tuong kamot apan nadali sa pagdala sa Emergency Rescue Unit Foundation.

Matud pa nga ang maong lumber yard gibantayan lang sa usa ka security guard nga si Rosaleo Ardiente uban sa mga kaubanang trabahante nga nakadungog sila og usa ka sipang boto sulod sa drier section.

Samtang nakadawat usab sila og laing alarma mga ala 1:10 sa buntag niadtong adlaw sa Pasko diin mokabat sa P1.2 milyones ang danyos niini dihang nasunog ang Ring Wings Warehouse sa may Mandaue reclamation area.

Usa ka Nestor Bahalla, duty nga gwardiya mitug-an sa mga imbestigador nga nakakita siya og ‘kuwitis” gikan sa yarda sa Sulpicio diin nahimutang pipila lang ka metros gikan sa warehouse nga didto usab mitugpa sa atop sa warehouse.