CEBU - Naangol ang usa ka giingong ‘wanted’ nga lalaki human kini nakigpinusilay sa anak sa iyaha untang gisuwayan og patay sa bukirang bahin sa barangay Vive lungsod sa Ronda sa may alas 12:00 sa udto niadtong petsa 24 adlaw’ng Miyerkules bisperas sa Pasko.
Ang biktima mao si Diego delos Reyes, molupyo sa maong lugar ug dunay standing warrant of arrest sa kasong attempted homicide sa lungsod sa Alcantara gumikan sa suway nga pagpatay unta niini ngadto sa usa ka Vicente Rasonabli niadtong petsa 30 sa buwan sa Marso ning tuiga.
Samtang ang suspek mao si Lando Rasonabli, anak ni Vicente uban sa usa ka wala mailhing tawo.
Matod ni PO1 Benedicto Rubia sa Ronda Police dihang nahinabi sa Banat News nga naglingkod sa waiting shed si delos Reyes dihang niabot ang suspek nga si Lando ug kauban sakay og motorsiklo dayong pusil kanila.
Apan nakabantay dayun ang biktima ug mibunot sad og iyang armas hinungdan sa sinukliay nila og bala apan naigo si delos Reyes sa walang paa.
Matud ni Rubia nakasibat na ang biktima ug mga suspetsado pag-abot nila sa lugar ug gibase nila ang report sa pamahayag sa mga tawo sa dapit nga posibleng panimawos ang motibo sa mga suspek. (BANAT NEWS)