4 P's naay moreklamo

CEBU - Napanglantawan ni Cebu City ABC President Eugenio “Jingjing” Faelnar nga daghan unyang mga kabus ang mangreklamo kun ipatuman na sa kagamhanan kining 4 P’s program.

Ang 4 P’s mao ang Pantawid Pamilyang Pilipino Program nga maghatag og “financial aid” ngadto sa labing kabus nga mga pamilya sa katilingban.

Una nang gipahibawo sa DSWD-7 nga 3 mil lang ka pamilya ang makapahimulos sa maong programa dinhi sa dakbayan sa Sugbu.

Tungod niini nakapanglantaw si Faelnar nga daghan unya ang mangreklamo niini, tungod usab kay ubay-ubay sa mga Sugbuanon ang nanginahanglan sa maong tabang.

Gipasabot hinoon sa opisyal sa DSWD-7, Jennifer Tadena, nga dili mahimo nga ang tanan ilang mahatagan tungod kay limitado ang ihinabang sa gobyerno.

Apan gipasalig ni Tadena nga ang labing kabus nga mga pamilya ra sa dakbayan maoy mahatagan sa hinabang salapi human sa akto nga pag-survey gikan sa napulo ka mga barangay sa siyudad nga girekomendar sa City Hall.

Matud pa ni Tadena nga may 18 mil ka pamilya nga kabus nga ilang nalista apan 3 mil ra ang kahatagan og hinabang sa ilang central office.

Ang mga barangay nga gi-survey sa DSWD-7 mao ang Tejero, T. Padilla, Sawang Calero, Duljo-Fatima, Inayawan, Mambaling, Kalunasan, Sudlon 1, Sudlon 2 ug Tagbao.

Kini nagpasabot nga ang makabenepisyo nga mga pamilya sa siyudad sa nahisgutang programa nagagikan ra sa maong mga barangay.

Tag P500 matag buwan sulod sa lima ka tuig ang madawat sa matag pamilya ug wala pay labot niini ang tag-P300 nga ihatag sa matag tinun-an sa kabus nga mga ginikanan. (BANAT NEWS)