CENTCOM gipaubos sa 'red alert'

CEBU - Gipa-ubos sa red-alert status ang Central Command   (CENTCOM) sugod kagahapon sa tungang gabii samtang gibantayan ug gipanid-an ang mga lihok sa Communist Party of the Philippines/New Peoples Army (CPP/NPA) sa ilang pagsaulog sa ilang anibersaryo.

Kini maoy pangandam ni Lt. Gen. Pedro Ike Inserto hepe sa Centcom aron mapugngan ang bisan unsang dautang laraw sa CPP/NPA sa pagpangatake sa mga vital installations dinhi sa Kabisay-an.

Si Inserto mibutyag nga mideklarar nang daan ang armadong puwersa sa nasud og unilateral ceasefire batok sa mga rebelding pundok sa wala pa ang Pasko hangtod na sa liwas sa Bag-ong Tuig.

Samtang si Police Regional Office (PRO-7) chief Ronald Roderos mideklarar usab kagahapon sa tungang gabii sa usa ka “heightened alert” aron usab ang iyang mga ginsakupang polis makabantay ug dili magkompiyansa sa ilang mga kaaway.

Matud pa ni Roderos nga bisan paman kun ang mga rebelding NPA mideklarar usab og ceasefire apan silang mga kapolisan wala mokompiyansa aron dili malutsan sa mga kaaway.

Ipaubos usab nila sa heightened alert ang Central Visayas karong Disyembre 30, ang kasumaran sa Rizal Day Bombing hangtod na sa bag-ong tuig.   (BANAT NEWS)