Tulo gisaka sa balay gipusil

CEBU - Duha ka tawo ang kritikal ang kahimtang samtang usa ang patay human pusila sulod sa ilang panimalay niadtong adlaw’ng Huwebes duha ka oras human sa pagsulod sa Pasko diha sa sitio Molave barangay Lagtang dakbayan sa Talisay.

Ang namatay giilang si John Arnel Cabajar, 26 ug nangaangol sila si Eddie Cabajar, 23, ug ang kapuyo niining si Jenie Garay, 20.

Sumala pa sa kapolisan natulog na si Cabajar ug Garay dihang mipauli sa ilang panimalay si John Arnel gikan milaag apan kalit nga misulod ang mga suspetsado nga sila si Melvin Lastimosa ug usa ka ginganlan og Jerry, nga ilang mga silingan ug walay daghang pangutana gipauwanan sila og bala.

Si John Arnel naigo sa iyang dughan samtang ang managpuyong sila si Cabajar ug Garay pagkadungog sa buto daling namangon aron mosusi apan giapil sila pagpusil.

Si Cabajar naigo sa walang kamot, samtang si Garay napusilan sa iyang ulo, human sa hitabo daling miikyas ang mga suspek.

Daling gidala sa Talisay City District Hospital ang mga biktima ug dayon gibalhin sa Don Vicente Sotto Memorial Medical Center apan gideklarar nga patay na si John Arnel.

Wala pa matino sa kapolisan ang motibo sa pagpamusil sa tulo.   (BANAT NEWS)