Polis gilabay sa Siquijor

CEBU - Bisan nagsingabot na ang Pasko gilabay ngadto sa Siquijor ang polis nga maoy traffic investigator sa dugoon nga Christmas party sa Police Regional Office (PRO-7) nga miresulta sa pagkamatay sa usa ka polis ug pagka-angol sa laing unom ka kauban human naatrasan sa Pajero nga gimaneho sa hubog nga si retired Supt. Benjamin Miaga.

Gipahibalo ni PRO-7 director Ronald Roderos atubangan sa mga sakop sa media ang pagrelibo kang PO3 Anthony Deligero ug pagbalhin niini ngadto sa Siquijor sugod karong adlawa tungod sa mga lapso sa iyang pag-imbestigar sa insidente.

Si PO3 Deligero nadestino isip chief traffic investigator sa City Traffic Operations and Management (Citom) gikatahong maoy nangunay og imbestigar sa nahitabo atol sa Christmas party sa Cebu Association of Retired Police, Inc. niadtong miaging adlaw.

Ang insidente miresulta sa kamatayon ni retired SPO3 Florefino Lapinid, 65, ug miangol nila ni retired SPO4 Ernesto Pacaña, SPO4 Aristo de Gracia, Supt. Edmund Binondo, Patrolman Concordio Castañares. Si Castañares nagpabilin pa sa intensive care unit (ICU).

Sumala pa ni Roderos nga bisan ang ‘basic procedure’ sa pag-imbestigar og traffic incident wala masunod ni PO3 Deligero pag-imbestigar sa insidente nga gilambigitan og retirado nga polis.

Si PO3 Deligero gikatahong pakyas sa pagpa-liquor test kang Miaga bisan nasayod siya nga hubog ang retiradong polis atol sa iyang pagpaatras sa iyang sakyanan.

Sumala pa ni Roderos nga mahimo unta nga dad-on ni PO3 Deligero si Miaga ngadto sa Citom tungod kay nalambigit kini og usa ka ‘traffic incident’ apan wala kini niya mahimo.

Samtang duol ra usab unta kaayo ang Cebu City Medical Center diin adto unta ipa-ubos sa liquor test si Miaga.

Matud ni Roderos nga wala siya matagbaw sa ‘verbal’ nga pagpasabot ni PO3 Deligero.

Gidayeg ni Roderos si PO3 Deligero tungod sa kamaayo niini nga imbestigador, apan nawad-an kini sa ‘focus’ sa nahitabong insidente sa PRO-7.

“Bakit nakalimutan niya? Bakit? Porke superintendent yun, porke dating polis, pinabayaan,” si Roderos nagkanayon.

Nakahunahuna usab si Roderos nga ipa-ubos sa leadership and skills training program si PO3 Deligero sunod tuig sa Regional Special Training Unit (RSU).Apan giklaro ni Roderos nga dili makalingkawas ang hepe sa Traffic Division nga si Supt. Marciano Batiancilla bisan on-leave kini, apil ang iyang deputy nga si Sr. Insp. Marcial Carandayo, day-shift supervisor Sr. Insp. Micheal Beltran ug night-shift supervisor Insp. Ranolfo Espina.

Si PO3 Deligero nga nahinabi sa Banat News kagabii nagkanayon nga andam niyang atubangon ang silot nga ipahamtang tungod sa lapso nga iyang nahimo.

Giangkon ni PO3 Deligero nga nataligam-an niya ang pagdala ni Miaga sa CCMC alang sa liquor test tungod kay ang anaa sa iyang hunahuna ang pag-una og paatiman kang Miaga ug ang pito ka samaron nga gidala sa ospital.

“Private man gud ang hospital, lisud man og way mo-guarantor. Ako na lang gipa-ubanan ni sir (Miaga),” si PO3 Deligero nagkanayon.

Matud niya nga hangtod kagahapon, walay interes ang mga kabanay ni Lapinid ug sa mga naangol sa pagpasaka og kasong criminal ug civil kang Miaga.

Apan si Roderos nagkanayon nga pasakaan gyud og kaso si Miaga ug ang Philippine National Police magsilbi nga ‘nominal complainant’ samtang walay interes ang mga kabanay sa mga biktima pagpasaka og kaso.

Si Cebu City Police Office director Sr. Supt. Patrocinio Comendador nagkanayon nga ipadayon nila ang imbestigasyon sa hitabo alang sa kaso batok sa mga traffic police ngadto sa Investigation Detective and Management Branch.

Nasayran nga si Lapinid dead-on-arrival sa Chong Hua Hospital, samtang si Castañares nagpabilin sa ICU bisan nahuman na ang pag-opera sa ulo niini.  (BANAT NEWS)