Tiyo mikulata sa pag-umangkon priso

CEBU - Nagtingkagol sa Talisay City detention cell ang usa ka uyoan kay gipasanginlang mibun-og pinaagi sa paglatigo og bakus ug pagpanghilabot sa kinatawo sa iyang 5-anyos nga pag-umangkong babaye, sa usa ka barangay sa maong dakbayan sa miaging semana.

Ang biktima na-admit sa Vicente Sotto Memorial Medical Center tungod sa hilabihang bun-og agi sa bakus sa iyang uyoan.

Base sa imbestigasyon ni PO3 Brenda Espina sa Women and Children’s Protection Desk sa Talisay City Police Station nga niadtong Disyembre 18, 2008 sa gabii giligid og bunal sa bakus sa uyoan ang biktima tungod sa kahinay mokaon niini ug dugay kaayong nahuman og panihapon ang bata .

Human sa maong pagkastigo giingong gikusi pa sa suspetsado ang bugan sa bata ug wala pa kini matagbaw gigitik-gitik pa ang kinatawo sa biktima.

Ang bata midugang pagtug-an nga human gitikgitika ang iyang kinatawo, gisulod pa gyud niini ang tudlo sa iyang uyoan.

Unya miingon ang biktima nga human niini gikusi pa sa iyang uyoan ang iyang nawong dayon giparok siya sa lamesa.

Midugang ang biktima nga gawas sa iyang uyoan, gisumbag pa siya sa bukton ug duha ka paa sa iyang kuya unya gipusposan pa siya og silhig niini.

Matud sa bata nga   walay gihimong reaksiyon ang iyang inahan sa maong hitabo.

Gibutyag sa biktima ngadto kang Espina nga dili na siya mobalik ngadto sa balay sa iyang uyoan.

`Ang bata midungag nga dili na siya maluoy sa iyang uyoan ug dili usab niya kini pasayloon hangtod nga malata sa prisohan.  (BANAT NEWS)