Manag-amahan gikasuhan

CEBU – Gipasakaan og kasong attempted homicide sa Cebu Provincial Prosecutor Office ang amahan ug anak human nisulay sa pagpatay sa usa ka gikaaway sa barangay Dapitan, lungsod sa Cordova niadtong Disyembre 6 mga ala 1:00 sa dayong kaadlawon.

Ang gipasakaan og kaso mao si Ricardo Cañete ug ang amahan niini nga si Nonoy, pulos hingkod ang panuigon ug nagpuyo sa Pilipog, Cordova.

Segun pa sa biktima nga si Reymond Buena, 22, nagpuyo sa Dapitan, Cordova kasikbit nga barangay sa Pilipog naglakaw siya padulong uli sa ilang balay dihang kalit lang niduol kaniya si Ricardo ug Nonoy Cañete ug way daghang pangutana mihapak kaniya og bato.

Ang batan-ong Cañete maoy mihapak kaniya og bato apan wala kini makaigo apan ang amahan niini nga si Nonoy kalit mition og armas kaniya hinungdan nga wala na siya makalihok.

Diha-diha kalit siyang gidunggab ni Ricardo sa bukobuko makadaghang higayon apan nakadagan siya ug nakauli sa panimalay ug nagpahatud sa hospital.

Hangtud sa pagpasaka og kaso, ang amahan ug anak nga suspetsado padayon pang nagtagotago ug gipangita sa kapolisan. – BANAT NEWS