Nagpasikat sa armas naunay

CEBU – Nahimong leksyon sa usa ka 19-anyos nga batan-ong lalaki ang pagdala-dala niini og armas nga aksidenteng mibuto ug nakaangkon kaniya samtang namisita sa iyang hinigugma diha sa sitio Kamalig Bato barangay Taboc siyudad sa Danao niadtong Domingo sa alas 11:30 sa gabii.

Ang biktima mao si Alejandro Traya, kinsa usa ka estudyante, molupyo sa barangay Licos sakop sa nahisgutang siyudad.

Matud ni SPO4 Teofilo Deguilmo sa Danao City Police dihang nahinabi sa Banat News ang biktima nagpasikat sa iyang uyab nga nagpagawal-gawal sa iyang armas.

Wala hinuon maestablisar sa kapolisan ang matang sa armas ug pangalan sa uyab nga gipamisitahan sa biktima.

Apan dihang gibunot niya kini diha sa tuong hawakan aksidente kining nibuto nga niresulta sa pagkaigo sa iyang walang kamot ug nilapos ang bala sa walang bahin sa paa niini.

Daling gitabang ang biktima sa kabanay sa iyang uyab ug gidali pagdala sa Danao City District Hospital ug gi-transfer sab dayon sa tambalanan dinhi sa dakbayan sa Sugbu.

Wala marekober sa mirespondeng sila si SPO2 Ramir Oliverio ang armas ug gituuhang gihipos kini aron di magamit batok sa suspek. – BANAT NEWS