CEBU – Patay ang usa ka 47-anyos nga lalaki ug nahabwa ang tinai niini human unaya pagtigbas sa iyang uyoan gamit ang pinote niadtong Domingo sa hapon sa sitio Dikyam, Lower Maghaway, dakbayan sa Talisay.
Ang biktima giila sa mga polis nga si Pantalio Tiabas, residente sa nahisgutang lugar kinsa nakaangkon og samad tinigbasan sa liog, walang nawong ug walang bahin sa lawas lahos sa likod ug maayong pagkahabwa sa tinai niini ug nakabsan sa iyang kinabuhi diha-diha.
Ang suspetsado mao si Esperedion Reponte, 49, residente usab sa maong lugar, boluntaryong mitahan sa iyang kaugalingon human sa maong hitabo ug nagtingkagol karon sa Talisay City detention cell.
Gitahan ni Reponte ngadto sa mga polis ang 24 ka pulgadang pinote nga iyang gigamit sa pagpanigbas.
Si PO2 Lino Diez sa homicide section sa pakighinabi niini sa Banat News kagahapon sa buntag mibutyag nga si Tiabas ug Reponte ang duna nay daang panagbangi tungod kay kaniadto nasukmagan sa biktima ang suspek.
Gipasanginlan ni Reponte ang biktima nga magmaoy kung mahubog ug kanunay mopasingit kaniya.
Sa wala pa mahitabo ang pagpanigbas, si Tiabas ang nakig-inom diha sa usa ka imnanan sa ilang lugar ug naatol usab nga diha ang suspetsado kuyog ang kapuyo.
Matud ni Diez nga si Tiabas nga nahubog og una daling mipauli aron makalikay sa samok.
Apan si Reponte nakauna na og uli sa ilang balay ug dihang naagi si Tiabas kalit lang kining gilayatan sa suspetsado kinsa miagi diha sa bintana ug gitigbas.
Nangangkon ang suspek nga nagtuo siyang pasipad-an siya sa biktima maong iyaha nalang kining giunhan.
Si Reponte ang gikatakdang pasakaan og kaso diha sa Talisay City Prosecutor tungod sa gibuhat niini. (Uban sa report ni Loraine Ebisa) (BANAT NEWS)