Lima naangol sa sunog sa Argao town

CEBU – Lima ka mga tawo ang nangaangol apil na ang 3-anyos nga batang lalaki ug duha ka katabang sa pagkasunog sa usa ka pinuy-anan sa pamilyang Gealon didto sa sitio Cancainap barangay Tulic lungsod sa Argao kagahapon sa ala 1:15 sa kaadlawon.

Ang nasunog nga pinuy-anan gipanag-iya sa usa ka Ricardo Gealon samtang giila ni Sr. Insp. Noel Nelson Ababon, fire marshal sa Argao fire department dihang nahinabi sa Banat News ang mga biktima nga pulos nakaangkon og 2nd degree burns mao ang asawa ni Ricardo nga si Gemina, Karen Kesha, 15; Kyle Richard; 3 anyos ug duha ka mga babayeng katabang niini nga wala pa makuha ang pangalan sa kabomberohan tungod kay pulos nalandig pa sa tambalanan sa South General Hospital.

Matud ni Ababon, bugtong si Ricardo ug anak niining si Kervin maoy unang nakagawas sa nagdilaab nga balay.

Gibana-bana sa kabomberohan nga mokabat ngadto sa P300 mil pesos ang danyos sa maong sunog nga nakontrolar alas 4:20 na sa kaadlawon ug gipaubos lang sa 1st alarm.

Matud sa mga silingan atol sa pagsukit-sukit sa kabomberohan, natulog ang pamilyang Gealon dihang nitumaw ang sunog ug gituohan sa kabomberohan nga dako na ang kalayo dihang nakamata ang mga sakop sa pamilya hinungdan nga gipugos nalang niini og guba ang bintana aron makagawas.

Sa imbestigasyon sa kabomberohan nagsugod ang kalayo sa sala diin nahimutang ang daghang mga series lights sa pamilyang Gealon nga maoy gituohang hinungdan sa sunog.

Sa paghimo ning balita gipaabot pa sa kabomberohan nga makagawas sa tambalanan ang mga naangol nga sakop sa pamilya aron makuhaan kini og dugang pamahayag sa maong hitabo. – BANAT NEWS