Joavan absuwelto sa murder

CEBU – Giabsuwelto sa korte kasong pagpatay si Joavan Fernandez, ang kontrobersiyal nga adopted son ni Talisay Mayor Socrates Fernandez.

Si RTC-7 Branch 12 Judge Estela Alma Singco sa iyang siyam ka pahina nga desisyon nga wala nay mahimo ang korte gawas lamang sa pagtugot sa demurrer to evidence nga giduso sa abogado ni Joavan Fernandez.

Nasayran nga si Joavan Fernandez kauban ang laing duha ka mga suspetsado maoy gitumbok nga maoy nagpusil patay kang Panfilo Baringque ug pagkaangol sa kauban nga si Temoteo Aleo niadtong Augsto 29 , 2006 didto sa Maglasang Village, Cansojong, Talisay City.

Sumala pa ni Judge Singco nga naprubahan sa prosecution ang facts sa krimen apan napakyas kini sa pagtumbok sa tinuoray’ng mamumuno.

Gitataw niini nga wala gyud maprobahi sa prosecution nga si Joavan Fernandez ang nagpusil patay kang Baringque tungod kay ang naka-survive unta sa maong krimen nga nagsilbeng lig-ong testigos nibakwi man sa iyang unang sinumpaang pamahayag ug wala pa gyud kini makatestigo sa korte.

Si Judge Singco miingon nga wala usab ma-recover sa kapolisan ang kalibre .45 nga armas nga gigamit ni Joavan pagpusil kang Baringque maong walay pulos ang pagpresentar sa walo ka mga kabhang sa .45 caliber nga narekober sa crime scene tungod kay walay natigayon nga ballistic examination.

Gumikan niini, gipaburan sa huwes ang demurrer to evidence sa abogado ni Fernandez nga maoy basehanan sa pagkaabsuwelto sa anak sa mayor sa Talisay. – BANAT NEWS