Polis namusil sa silingan

CEBU – Usa ka negosyante ug usa ka polis sa Mabolo Police Station ang gipasanginlang namusil sa ilang silingan kagahapon sa alas 2 sa kaadlawon diha sa Nivel Hills sa barangay Busay ning dakbayan.

Ang napusilan mao ang usa ka technician sa Department of Agriculture nga si Marcelo Tojino Jr.

Ang mga suspek giilang sila si SPO1 Oliver Glodove, 37, lumolupyo sa nahisgutang dapit ug kauban niining negosyante nga si Jose Mendaros Jr., 34, taga First Street La Guardia, Barangay Lahug.

Base sa imbestigasyon sa Homicide Section ang anak sa biktima nga si Mark mitug-an nga naglalis ang iyang amahan batok sa managtiayong polis nga sila si SPO1 Glodove ug asawa niining si Charito.

Si Mendaros kasamtangang nagbarog diha tupad sa managtiayon niadtong tungura ug atol sa kainit sa panaglalis kalit lang nipabuto og warning shot si Glodove hinungdan nga nangayo og tabang si Mark sa iyang igsuon nga si Glenn aron manawag og polis.

Apan gikatahong wala sila makagawas tungod kay si Glodove ug Mendaros diha nagbarog sa atubangan sa ilang balay ug sa kalit lang laing buto sa armas ang nipaka ug ning tungura naigo ang biktima kinsa naglingkod diha sa may bintana sa ilang balay.

Dihang misinggit ang biktima nga naigo kini pagpusil ni Glodove daling misulod ang duha ka suspek sa ilang panimalay ug gitabangan ang biktima nga masakay sa sakyanan ni Mendaros ug gidala sa tambalanan.

Nasuta nga naigo si Tojino diha sa dughan ug gitabang diha sa Perpetual Succour Hospital, diha usab mitahan sa iyang kaugalingon si Glodove sa mirespondeng mga imbestigador sa Homicide Section.

Samtang si Mendaros gidala sa mga polis ngado sa Mabolo Police Station ni SPO1 Neri Cahimat ug gi-turn-over ngadto sa Homicide Section alang sa imbestigasyon.

Nasayran nga samtang gidala ang biktima sa tambalanan nakadasmag ang ilang sakyanan og duha ka taxi nga gipanag-iya sa Holiday ug Ritchelda Taxi pag-abot sa eskina sa Gorordo ug Escario nga miresulta usab sa pagkaangol sa pasahero sa Holiday taxi nga sila si Cecilia Bautista ug Ma.Cristina Rohland ug nalandig sa Chong Hua Hospital. – BANAT NEWS