Tindero'g isda gipauwanan og bala kritikal

CEBU - Talandugon ang kahimtang sa usa ka tindero’g isda human gipauwanan og bala sa duha ka lalaking nagtaptap sa nawong nga nagsakay’g motorsiklo alas 6:00 pasado niadtong miaging gabii sulod sa merkado publiko sa barangay Poblacion 4 lungsod sa Tuburan.

Ang biktima giila sa kapulisan nga si Roberto Regulacion, 42, taga Poblacion 6 sa nahisgutang lungsod nga napusilan sa walang abaga lapos sa dughan ug laing samad pinusilan diha duol sa walang tutoy.

Ang gitumbok mao ang duha ka suspetsadong lalaki luwan sa kolor blue nga binabaye’ng motorsiklo nga nagtaptap og sinina sa ilang mga nawong kinsa daling nakasibat human sa pagpamusil.

Si PO1 Junel Ater sa Tuburan Police Station nga gikahinabi sa Banat News nagkanayon nga niinom og tuba sa tubaan sulod sa merkado ang biktima uban sa mga higala dihang kalit niabot ang mga suspek dayong namusil.

Ang biktima gidali sa pagdala sa iyang mga higala sa tambalanan sa Tuburan apan gipabalhin gilayon sa tambalanan dinhi sa dakbayan sa Sugbu gumikan sa grabeng samad niining nahiaguman.

Wala pa matino sa kapolisan ang motibo sa pagpusil sa biktima apan dunay nahibaw-an ang kapolisan nga may gikaaway ang biktima sa usa ka videokihan sa nahisgutang lugar niadtong milabay’ng semana. – BANAT NEWS