550 kabus nga bata gasahan sa Mandaue

CEBU - Agi’g pagsaulog sa Kapaskuhan, ang dakbayan sa Mandaue ug ang barangay Pakigne sa Minglanilla mohatag ug mihatag og mga gasa sa kabataan ug ingon man sa ilang mga konstituwente.

Ang dakbayan sa Mandaue mopahigayon og Christmas Party diin imbitaron ang 550 nga kabataan nga anak sa mga kabus nga pamilya nga himuon sa Mandaue City Council for the Children Protection karong adlawa, Disyembre 22 sa Mandaue City Sports and Cultural Complex.

Ang asawa ni Mayor Jonas Cortes nga si Sarah Cortes nga maoy chairperson sa MCCCP miingon nga tibuok adlaw ang maong program nga tawgong “Pasko sa Kabataan” ug sugdan pinaagi sa usa ka Santos nga Misa alas 9 sa buntag.

Ang pundong salapi nga gigahin alang sa mga kalihokan sa Pasko sa Kabataan ang gikuha gikan sa “Horror Booth” nga gipasiugdahan usab niadtong miaging bulan.

Nunot sa gihan-ay nga mga kalingawan alang sa kabataan maoy ilang madawat nga ipanghatag gikan sa kagamhanan sa dakbayan ang school bag, supplies, mga pinutos nga pinaskohan nga naglakip sa pagkaon ug uban pa.

Samtang ang konseho sa barangay Pakigne, sa Minglanilla mipahigayon sa “Handog Pamasko” niadtong Huwebes alang sa mga molupyo diha sa ilang lugar.

Si Armando Juezan kapitan sa nahisgutang barangay nagkanayon nga ang nahisgutang proyekto usa ka pamaagi sa ilang pasalamat ug regalo ngadto sa 16,000 nila ka mga konstituwente.

Ang Handog Pamasko ang naglangkub sa medical mission kinsa gipangulohan ni Dr. Pacita Cavalida, libreng putol sa buhok, manicure ug pedicure ug dental services alang sa mga residente sa Pakigne.

Gibutyag ni Juezan nga nag-hire sila og mga beautician kinsa maoy miatiman sa gustong magpaanyag. – BANAT NEWS