'Adik' naghikog patay

CEBU - Usa ka giingong nagumon sa ginadiling drugas naghikog-patay sulod sa ilang payag niadtong milabay’ng hapon sa sitio Tagaytay, barangay Tal-ot lungsod sa Barili.

Ang naghikog-patay giila sa kapulisan nga si Mario Bacera, 34, napalgang may higot nga pisi sa liog ug nagbitay ug wala nay kinabuhi.

Si SPO1 Zaldy Orillo sa Barili Police Station nga gikahinabi sa Banat News nagkanayon nga mga alas 3 pasado niadtong milabay'ng hapon gikatahong nilakaw si Bacera.

Apan mga alas 5 pasado gikatahong gipangita kini sa iyang amahan nga si Jesus ug dihang gisulod ang ilang payag dili layo sa ilang panimalay nakurat nalang nga nakit-an ang iyang anak nga nagbitay nga wa nay kinabuhi.

Hinuon wa nalang kini gipaubos sa autopsy gumikan kay kumbinsido ang mga ginikanan niini nga naghikog gyud kini gumikan kay taud-taod na kining naghambin sa sakit nga nerbiyos.

Sumala pa sa report ni Orillo nagumon kaniadto sa ilegal nga drugas si Bacera dihang nangarga kini sa Carbon market sa dakbayan sa Sugbu ug dihang nasakit sa pangisip epekto sa paggamit og ilegal nga drugas gipapauli na kini sa Barili. – BANAT NEWS