Tigulang 'dasmagan DOA sa hospital

CEBU - Usa ka 71-anyos nga tiguwang babaye ang dead-on-arrival sa Julio Cardinal Rosales Hospital human usab makaangkon og grabeng kadaot sa iyang ulo dihang nadasmag ang traysikol nga gisakyan niini sa usa ka Toyota Revo niadtong Sabado sa hapon sa National Highway barangay Kawayan lungsod sa Dalaguete.

Ang namatay giila sa kapulisan nga si Gaodiosa Payusan ,71, taga barangay Casay sa nahisgutang lungsod tungod sa kadaot sa ulo human sa panagbangga.

Samtang nagpabilin sa usa ka tambalanan dinhi sa dakbayan sa Sugbu ang drayber sa traysikol nga si Dino Amamangpang, nga taga barangay Kawayan, pasahero niining minor de edad nga si Raffy Enricoso, 16, ug ang driver sa Toyota Revo nga may plakang GPS-259 nga si Renita Tampus, 44, taga barangay Banhigan.

Matud pa ni PO3 Requina nga padulong si Tampus sa habagatang bahin sa Sugbu dihang gikasugat ang traysikol ni Amamangpang nga padulong sa amihanan.

Gikatahong mi-overtake ang traysikol sa gisundang sakyanan hinungdan nga misampak kini sa sakyanan ni Tampus.

Gumikan sa kakusog sa impact maayong pagkalimbuwad sa traysikol ug nikatkat sa atubangang bahin sa Revo nga nakamugna'g grabeng kadaot sa duha ka sakyanan ingon man sa mga pasahero.

Dunay mga report nga nakuha sa Banat News nga matud pa ang driver nga si Amamangpang gikatahong bag-uhay pang gibuwagan sa iyang uyab apan ang mga polis wala mokumpirmar niini.

Padayon pang giimbestigar sa kapolisan kung si kinsa ang sad-an sa maong insidente ug aron maoy manubag sa kamatayon sa tiguwang ingon man kadaut sa ubang pasahero ug kabtangan. – BANAT NEWS