4 naangol sa pagpanunggab

CEBU - Upat ang nalandig sa tambalanan human mabiktima sa managlahing insidente sa pagpanunggab sa managlahing dapit sa dakbayan sa Sugbu kagahapon sa kaadlawon sulod lang sa duha ka oras apan sagad kining nahitabo atol sa mga disko sa sitio.

Unang nalandig sa usa ka pribadong tambalanan mga alas 12:10 kagahapon sa kaadlawon ang usa ka Victor Bayadoc, 29, sub-contractor sa shellcraft, taga barangay Tawason dakbayan sa Mandaue.

Human kini makaangkon og samad dinunggaban sa tuong dughan, lawas ingon man ulo, human gitabangan sa pagkulata ug gidunggab gawas sa usa ka peryahan diha sa sitio Cadahuan, barangay Talamban.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office, si Bayadoc niduaw sa panimalay sa iyang ugangan tungod sa gipahigayong disco sa lugar ingon man duwa sa peryahan.

Matud pa niini nasukod ang mga tawo dihang iyang gipautong ang makina sa iyang motor aron siya makaagi tungod kay gubaon ang busina niini.

Apan ang kabanha sa   iyang motor nakapainit sa mga tawo ug diha-diha gikuninitan siya’g kulata ug dunay kalit nga midunggab kaniya maong nalandig siya sa tambalanan.

Hinuon usa sa mga suspek nga si Jofreler Cabase, 24, 5th year nga tinun-an sa Electronic Communication Engineering ang gidakop sa mga tanod ug gikatakdang kasuhan.

Pagka-ala 1:00 sa kaadlawon usa ka Junrey Abayon, 20, construction worker nga taga Lower Natimao-an, Carmen ang nabiktima sa pagpanunggab diha sa Buhisan Proper.

Usa ka Jeffrel Mendoza, 20, taga Langub- Buhisan maoy gitumbok nga midunggab niya gamit ang “icepick” nga nitaop sa walang dughan sa biktima.

Matud pa sa mga polis nakig-disko ang biktima uban sa mga katrabaho diha sa maong lugar apan sila nakakita og bikil sa laing pundok hinungdan nga kalit siyang gidunggab ni Mendoza, ang akusado nadakpan sa kapulisan human sa follow-up operation.

Usa ka oras human niini, laing nabiktima sa pagpanunggab ang nalandig sa tambalanan diin usa ka Dennis Abordo, 22, gidunggab sa iyang silingan nga si Romar Dihalopos diha sa may A. Lopez St., sitio Upper Bonbonan barangay Labangon.

Si Abordo nalandig sa CCMC human makaangkon og samad dinunggaban sa buko-buko sa tawong gikalalis sa iyang higalang si Marlon Sabiona sa diskohan.

Gikatahong nakauli na unta ang biktima apan mibalik aron apason ang manghod ug diha na kini maabti sa suspek ug kalit nga gidunggab sa likod ug human niini daling miikyas ang suspek.

Paglabay sa 20 minutos nabiktima usab sa pagpanunggab diha sa sitio Lawis barangay Mambaling ang kargador nga si Amer Paculang, 34, nga taga dakbayan sa Carcar.

Ang biktima nadunggaban diha sa walang tangkugo, walang bukton, walang lawas samtang nangihi sa dihang padulong unta sa videokihan sa dapit. – BANAT NEWS