Pusher sa Lapulapu tiklo

Cebu - Way piyansa nga girekomendar sa usa ka drug pusher nga nasikop atol sa buybust operation didto sa Sitio Cambiyohan, Barangay Marigondon dakbayan sa Lapulapu sa milabay’ng gabii.

Ang gipasakaan og kaso mao si Sherwin Sollano y Sales, 37, minyo nga taga Cambiyohan, ug ang ig-agaw niini nga si Marvin Andales y Sollano, hamtong nga taga Cambiyohan usab.

Matud pa ni P/ Insp. Raymundo Rodriguez ug P/Insp. Junil Caadlawon sa Lapulapu City Police Office nga pormal nilang gipasakaan og kaso niadtong Biyernes sa hapon gumikan sa paglapas sa Akta Republika 9165 diin walay piyansa nga girekomendar niini.

Kahinumdoman nga si Sollano uban sa iyang ig-agaw nga si Andales nasakpan sa akto nga namaligya og ginadiling drugas ngadto sa usa ka decoy sa kapolisan.

Apan si Andales nakasibat kay mikaratel kini og dagan hangtod pag-abot sa kapolisan busa karon gawasnon pa kini, apan gipasakaan na og kaso.

Si Sollano nakuhaan og duha ka gagmay’ng pakete sa gituohang shabu, buy bust money nga mobalor og P450; P50 nga halin sa ilegal nga drugas, ug laing 6 ka gagmay nga pakete sa shabu.

Si Sollano kasamtangang gibalhog karon sa kapolisan sa Lapulapu ug nagpaabot nalang kining ibalhin ngadto sa Lapulapu City Jail. – BANAT NEWS