2 karsada sa Carbon tak-opan

Cebu - Gitakdang sirad-an sa Cebu City Traffic Group ingon man sa City Traffic Operations and Management (Citom) ang duha ka dalan sa siyudad sulod sa lima ka adlaw alang sa himuong Pasko sa Carbon.

Ang tak-upan nga mga dalan sugod karong Disyembre 26 mao ang portion sa Manalili ug Plaridel St. gikan sa dalan Lincoln ngadto na sa J. Leyson Street.

Subay niini kadtong mga PUJ nga dunay rotang 03B, 04I, 06K, 07B, 07G, 14C ug 17C nga moagi sa dalan Magallanes anha na mo-right turn sa Manalili St.; left turn sa dalan Lincoln, right turn sa F. Gonzalez St.; left turn sa M.C. Briones St.; ngadto na sa ilang naandang rota.

Kadtong mga jeep de pasaheroan nga dunay 03C, 03G, 03L, 07G, 13B, 62B, ug 62C nga rota samtang magsubay sa Manalili St., anha na usab mo-left turn sa Magallanes Street, right turn sa Plaridel St.; left turn sa Lincoln St.; right turn sa F. Gonzalez St.; left turn sa M.C. Briones St.; ngadto na sa destinasyon niini.

Sa pikas bahin ang mga PUJ usab nga dunay 04I, 14C, ug 17C nga moagi sa dalan Magallanes anha na usab right turn sa Calderon St., left turn sa J. Leyson St., lahos na ngadto sa M.C Briones St. paingon sa naandang agianan niini.

Samtang kadtong 06C, 06E, 06F, 07D, 07E ug 14B nga rota nga tig-agian sa dalan Osmeña Blvd. anha gihapon right turn sa Plaridel St., apan anha na left turn sa F. Gonzalez St.; left turn sa M.C. Briones St. lahos na ngadto sa ilang destinasyon.

Nunot sa maong mga kausaban ang City Traffic Group ug Citom nipahimangno sa mga driver sa pagsunod sa ipakatap unya nga mga traffic sign.

Kini aron dili makahatag og kahasol sa ubang road user nga magdali paingon sa ilang tagsa-tagsa ka destinasyon atol sa ipatuman nga traffic rerouting. – BANAT NEWS