4 ka polis gikiha sa 'asset'

Cebu - Upat ka mga polis sa lungsod sa Consolacion ang gipasakaan og kasong arbitrary detention sa usa ka giingong asset sa Regional Intelligence Division.

Ang nag-abutang og kaso mao sila si Retired Police Supt. Lamberto Alilin, PO3 Lilito Dinampo, PO3 Norberto Cejas ug PO3 Sherwin Leyson pulos nadestino sa Consolacion Police Office.

Ang biktima nga si Giovannie Taborada, lumad nga taga Casili lungsod sa Consolacion uban sa asawa niini nga si Maricel nagkanayon nga niadtong pasado alas 2:00 sa hapon sa Nobiyembre 30, ang grupo nila ni Alilin ang nisakay og Tamaraw FX ug tungod sa kadangog sa dalan, natumba sa kawayan nga koral ni Taborada.

Nasuko si Alilin ug kaubanan dihang giingnan sa mga estambay nga maghinay sa pagmaneho.

Niuli sa police station si Alilin ug kaubanan ug pipila ka minutos ang nakalabay mibalik kini nga nakasibilyan na uban sa mga nahisgutang polis ug mga barangay tanod ug miyembro sa Barangay Intelligence Network.

Gikatahong si Taborada gipangutana sa maong mga polis kung si kinsa ang maong mga estambay nga mitambag kanila sa paghinay-hinay nga ilahang gikalalis apan dihang wala motug-an si Taborada gisikop siya sa grupo.

Atol sa pagdakop nakuhaan usab og usa ka armas si Taborada apan bisan may papeles nga napakita ang naulahi gikatahong gisikop gihapon siya ug gitanggong sulod sa pipila ka adlaw diha sa karsel sa police station nga walay kasong gipasaka.

Ang buhatan sa Provincial Prosecutor Office mohatag pa og igong panahon aron makatubag sa maong asunto ang mga akusado sa dili pa kini hingpit nga ipasaka sa korte. – BANAT NEWS