Negosyante gipusil

Cebu - Nagpabilin pang giatiman sa mga doktor sa usa ka pribadong tambalanan ning dakbayan ang usa ka negosyante’g litson human mabiktima sa pagpamusil niadtong Biyernes sa alas 9:15 sa gabii diha sa barangay Lahug ning dakbayan.

Ang kapulisan miila sa maong negosyante nga si Leonardo Ramin Mesa, 57, nagpuyo sa nahisgutang lugar nga nakaangkon og samad pinusilan sa tangkugo nga nilapos sa dunggan niini.

Samtang ang mga gikatahapang suspetsadong duha ka wala mailhing lalaki   dali kaayong nakasibat palayo sakay sa usa ka motorsiklo nga wala makuha ang plate number niini ingon man kolor.

Si SPO4 Alex Dacua imbestigador sa Homicide Section sa Cebu City Police Office nga gikahinabi sa Banat News nagkanayon nga ang biktimang si Mesa busy sa pag-atiman sa iyang baligyang litson dihang miabot ang mga gikatahapan.

Usa ka bala tumong sa tangkugo maoy nakapahagba sa biktima kinsa dali sad kaayong nadala sa usa ka pribadong tambalanan ug pabilin pang giatiman sa mga doktor atol ning pagsulat sa balita. – BANAT NEWS