City Hall employees hatagan og performance bonus

Cebu - Hatagan sa kagamhanan sa dakbayan sa Sugbu og performance bonus ang dul-an sa P5 mil ka mga kawani sa City Hall matud pa ni acting mayor Michael Rama ngadto sa mga empleyado atol sa usa ka kalihukan diha sa Plaza Sugbu.

Apan gitataw hinoon sa acting mayor nga mangita pa ang siyudad ug kakuhaan sa pundo alang sa nahisgutang benipisyo.

Dili pa usab matino ni Rama kung kaya ba sa city government ang paghatag sa tag-P10 mil nga bonus ngadto sa nahisgutang mga kawani.  

“Dili man sab pwede nga dili nato hatagan kay lisod kaayo ang panahon, dako unya na og matabang sa mga kawani kung naa silay extra nga madawat,” dugang sa acting mayor.

Nagsagol hinoon ang reaksyon sa mga kawani sa City Hall human masayod sa pahibawo ni Rama diin dunay nalipay niini ug dunay naglisod sa pagtoo.

Nalipay ang uban tungod kay sila wala na magdahom nga mahatagan pa sa maong benepisyo tungod sa pagpakahilom sa mga opisyal sa siyudad.

Sa pikas bahin nagduda usab ang pipila ka mga empleyado sa gipahibawo sa acting mayor tungod kay giingong daghan pa ang bayronon sa City Hall kanila.

Usa ka kawani miingon nga wala pa nila madawat ang 10 porsiyentong salary differential sukad niadtong miaging buwan sa Hulyo.

Dugang niini, wala pa usab mahatag sa kagamhanan sa dakbayan ang P12 mil nga Additional Compensation Allowance (ACA) nga niadto pang tuig 2006 gisaad.

Gani mas gipalabi pa sa tinubdan nga ihatag sa siyudad ang ilang ACA kay sa gisaad sa acting mayor nga performance bonus.

“Wala gani klaro kung pila gyud ang bonus nga ilang ihatag namo, mas maayo pa og ang ACA ilang unahon kay P12 mil to,” sumala sa usa ka kawani.

Taliwa niini nanghinaut gihapon ang kadaghanan sa mga empleyado sa kagamhanan sa dakbayan nga mahatag kanila ang gisaad ni Rama. – BANAT NEWS