BIN nga nakapatay mihimakak

Cebu - Ni-plead not guilty ang usa ka miyembro sa Barangay Intelligence Network kon BIN sa kasong murder nga giatubang nunot sa pagpusil patay sa usa ka traysikad driver niadtong Nobiyembre 18 ning tuiga diha sa Espina Village Guadalupe ning siyudad sa Sugbu.

Si Primo Oliveros Retarino, 50, BIN member ug nagpuyo sa Fortune Compound, B. Rodriguez Cebu City wala moangkon sa maong asunto dihang gi-arraign sa sala ni RTC-7 Judge Ester Veloso pagpusil patay kang Richard Gemina David, usa ka traysikad driver ug nagpuyo gihapon sa Guadalupe.

Ang Public Attorneys Office kon PAO lawyer nga si Atty. Renaldo Menchavez maoy nangabugar kang Retarino dihang gipahigayon ang iyang arraignment.

Nasayran nga usa ka private security guard ang nitestigo batok sa suspek ug mitug-an nga si David may pasaherong babaye nga buot nga mosulod sa Espina Village niadtong tungura.

Apan gibabagan kini sa front guard nga sila si John Alfanta ug Andrew Retarino anak sa suspetsado human gimando sa suspek nga dili kini pasudlon ug palakwon lamang bisan pa og pasado alas 10 na sa kagabhion.

Ang biktima nga si David nikanaog sa iyang traysikad ug miharong ngadto sa security guard apan giduol kini ni Retarino ug gipusil makadaghang higayon ang biktima hinungdan sa hinanaling kamatayon ni David.

Samtang ang amahan ug anak nga Retarino lakip na ang laing security guard nipalayo dayon sa maong lugar human sa maong insidente apan nasikop sa respondeng policemen si Retarino sa follow up operation. – BANAT NEWS