"No Smoking Zone" sa Babag gihimo

Cebu - Gideklalar na nga “no smoking zone” ang dalan sa barangay Babag sa dakbayan sa Lapulapu nga nagpaingon sa lungsod sa Cordova nga maoy dapit nga gitugot sa kabomberohan alang sa pagladlad sa mga vendor sa pagbaligya sa nagkadaiyang matang sa paboto.

Si SFO2 Marcelo Tero sa Bureau of Fire Protection sa maong dakbayan nga nahinabi sa Banat News miingon ilang gitugot ang pagladlad sa mga stall sa daplin sa dalan sa maong lugar sugod niadtong Disyembre 15 ug hangtod kini sa Disyembre 31 karong tuiga.

Matud pa niya nga ilang gideklarar nga no smoking zone ang maong dalan sa barangay Babag alang sa paglikay sa aksidente hangtod nga nag-display pa ang mga vendor sa gibaligya nilang paboto.

Ang mga vendors wala tuguting makabaligya kung di kumpleto sa ilang mga papeles ug uban pang gikinahanglang rekisitos.

Sa pagkakaron duha lang ka mga tiggama og lokal nga pabuto nga mao ang JP Fireworks ug Mario Avila ang gitugutan sa kabomberuhan diha sa maong dapit.

Ang maong mga tiggama gipailawom og fireworks awareness seminar aron sa kasigurohang luwas ang ilang mga produkto. – BANAT NEWS