Vidal nahimuot sa kadasig sa kabataan sa Misa de Gallo

Cebu - Gikahimuot ni Arsobispo Ricardo Cardinal Vidal ang nakitang kadasig sa kabataan pagtambong sa Misa de Gallo atol sa ika-upat nga adlaw sa pagsaulog niini.

Ang Arsobispo maoy pormal nga mibukas sa bag-ong nahuman nga Baptistry diha sa simbahan ni Santa Teresa de Avila sa barangay Poblacion ug atol usab kini sa kasaulogan sa ika-59 nga adlaw’ng natawhan ni Monsignor Joselito Tajanlangit ang Kura Paroko sa sa nahisgutang parokya.

Ang maong kalihokan ang gitambongan sa mga opisyal sa dakbayan kinsa gipangulohan sa amahan sa unang distrito nga si Kongresista Eduardo Gullas.

Human sa nahisgutang inugurasyon si Vidal mipahigayon sa misa kinsa ang nahisgutang mga opisyal ang mitambong usab niini.

Si Vidal nagkanayon nga nahimuot siya sa iyang nakita nga kasagaran sa nanimba mga batan-on, hasta ang ilang paglukdo og mga bangko aron may kalingkuran nabantayan usab sa Cardinal.

Matud pang Vidal usa kini ka senyales nga may importanteng kabilin ang mga katiguwangan sa Talisay sa ilang kabataan ug kini mao ang wala nila pagpaulahi sa pagtudlo sa maayong gawi ug pagpalig-on sa pagtuo diha sa alimpatakan sa mga bata.

“Sa matag misa sa kaadlawon namatikdan gayud nako nga daghan gayud kaayo ang mga batan-on nga madasigon nga mag-ambahan nganhi sa simbahan aron motambong sa misa sa kaadlawon, bisan tingali og gisungog kana sila sa mga urog ug kabag-ohan nga kuno kinaraan na wala nay kapuslanan ang tinuohan,” dugang sa Arsobispo.

Ang Arsobispo ang miawhag sa mga hamtong nga agakon ang kabataan sa maayong dalan aron malayo kini gikan sa mga bisyo isip kaakuhan. – BANAT NEWS