Natagak sa minahan tipi

Cebu -Nabuak ang ulo ug namatay ang usa ka foreman human kini aksidenteng nahulog sa gibana-banang 25 ka tiil ang gilawmon sa usa ka minahan og carbon nga gipanag-iya sa usa ka board member didto sa bukirang bahin sa barangay Balaa lungsod sa Argao.

Ang biktima nga namatay gyud diha-diha ug wala na madala pa sa tambalanan mao si Alex Llorando, kinsa maoy general foreman sa maong minahan ug pag-umangkon ni 2nd district board member Wilfredo Caminero nga maoy nanag-iya sa maong minahan og carbon.

Gibutyag ni board member Caminero dihang nahinabi sa Banat News alas 2:00 sa hapon nahitabo ang insidente samtang dunay gisaka sa taas nga bahin sa minahan ang biktima apan aksidente kining natagak ug didto motugpa sa daghang mga damba nga troso sa ubos nga bahin ug maayong pagkabunal ang ulo niini hinungdan sa iyang hinanali nga kamatayon.

Matud ni Cameniro nakalitan siya sa hitabo gumikan kay naatol nga nagtambong siya sa gipahigayong ceremonial lighting sa Cebu International Convention Center (CICC) niadtong tungura dihang gitawgan siya sa iyang staff ug gipahibawo sa maong hitabo.

Gihulagway nga susama na og iyahang igsoon ang namatay niyang pag-umangkon gumikan kay diha na kini nipuyo kaniya human kini mailo na sa mga ginikanan ug maoy iyahang gisaligan pagdumala sa ilang minahan sulod sa 30 ka tuig na kapin ang nilabay.

“Dili na nato na estoryahon ang financial assistance dong, kay mohatag man gani mi og assistance sa tanang maaksidenting empleyado unsa pa kaha nang akong pag-umangkon unya suod pa gyud kaayo sa among pamilya,” dugang asoy ni Caminero.

Kagahapong adlawa pormal nga gihatod sa lubnganan sa Argao Public Cemetery si Llorando nga gitambungan gyud mismo sa board member ug sa tibuok sakop sa pamilya niini.

Samtang nasayran sa Banat News gikan ni PO1 Eddie Semilla sa Argao Police Station nga wala ma-blotter ang maong panghitabo. - BANAT NEWS