7 kanding gikaon sa 'sigbin'

Cebu - Pito ka mga kanding ang namatay human gipangkaon sa gituohang “iro sa engkanto o sigbin” didto sa barangay Sta. Felomina, lungsod sa Alegria niadtong milabay’ng Biyernes sa alas 2 sa hapon.

Si SPO1 Rutillo Cardona sa Alegria Police Station nga gikahinabi sa Banat News nagkanayon nga ang tag-iya sa kanding nga si Raul Leniso, mag-uuma ug hingkod ang panuigon nagpuyo sa nahisgutang dapit mi-reklamo sa ilang buhatan labot sa maong insedenti.

Hinungdan nga niadtong Lunes gipatawag ang tag-iya sa iro nga kahibulungan nga si Segundo Gorgio, hingkod ang panuigon ug kapuyo niining si Aurora Lastimosa pulos hingkod ang panuigon.

Matud pa ni SPO1 Cardona nga mireklamo si Leniso ug midemanda ug sa pagpabayad sa danyos sa iyang mga kanding nga dili na kapuslan nga matud pa gipaak ug namatay gumikan sa “iro” ni Gorgio.

Hinuon atol sa ilang pag-atubang didto sa Police Station nakab-ot gyud ang sabot-sabot ang desisyon sa tag-iya sa kanding ug iro nga bayran na lang kini sa kantidad nga P12 mil     pinaagi sa data-data.

Apan sila sa kapolisan ug mga tawo didto sa dapit nakurat sa maong hitabo dihang gi-report ni Leniso ang nahi-aguman sa iyang mga kanding nga gilawig ug gipangbuhian dihang gipangkaon sa iro nga kolor “brown ug itom”.

Sumala pa niini nga ang tag-iya sa kanding nitug-an nga dihang ilang nakit-an ang iro nga kolor “brown ug itom” gipangkaon ang iyang kanding ug gipamaak ug nangamatay.

Apan nakapanglimbawot sa ilang balahibo gumikan kay dihang ilang gitiwasan ang kanding aron mapuslan pa ang karne niini dili makaon gumikan kay nalata gilayon ang ginhawaan, ingon man atay ug nanglagom.

“Kami diri sa among lantaw dili ordinaryong “iro” kay kun mapaakan ang kanding ug mamatay malata diay dayon ang ginhawaan ug atay…nahibulong gyud ang mangingihaw,” sumala pa ni SPO1 Cardona.

Gibutyag niini nga ang mga kanding gipangpaak sa nagkadaiyang parte sa ilang mga lawas ug namatay gilayon hinungdan nga kahibulangan ang klase sa maong iro.

“Ang ordinaryong iro…duha ngadto sa tulo ka kanding kun mapaakan dili siguro gilayon mamatay apan kini lahi patay dayon ang pito ka kanding..dili ni ordinaryo..iro gyud ni sa “Engkanto o kaha sigbin”, dugang pa ni SPO1 Cardona.

Gani human nila mabantayi sa tag-iya nga gipamaak ug gikaon ang ilang mga kanding sa kahibulongang “iro” ilang gisundan og matud pa ilang nakonpermar nga didto gyud mopauli sa balay sa “tag-iyang si Gorgio.

Apan matud pa daling gipanghimakak sa tag-iya ang maong insidenti ug gikatahong nahitabo ang panaglalis niini hinungdan nga niadtong Lunes gipatawag sa Police Station, hinuon nagkasabot lang ang matag habig nga mobayad ang tag-iya sa iro sa danyos.

Subay niini iyang gipahibalo ngadto sa tag-iya sa maong iro nga ipapatay nalang kini kun ilang makit-an kini aron dili makapangbiktimag mga hayupan.

Dugang pa nga dako ang iyang pagtuong dili iro ang nakapaak kun dili “iro gyud ni sa engkanto o sigbin apan hinuon dili pa sila makakunpermar kun duna ba gayo'y sigbin diha sa ilang dapit kay wala pa sila ka kita niini. – BANAT NEWS