'Mamasang' gikonbikto

Cebu - Gikonbikto sa korte ang usa ka “mamasang” sa Kamagayan ning siyudad sa Sugbu sa kasong pagpamogaw sa usa minor de edad.

 Ang gikonbikto ni RTC-7 Branch 14 Judge Raphael Yrastorza sa kasong kalapasan sa Republic Act 7610 kon Anti-Trafficking in Person Act nga karon gitawag na og Special Protection of Children Against Child Abuse, Exploitation and Discrimination Act mao si Relinda Lim usa ka negosyante nga taga D. Jakosalem ning siyudad sa Sugbu.

 Si Judge Yrastorza mipahamtang kang Lim og silot nga pagkabilanggo gikan sa upat ka tuig hangtud na sa 9 ka tuig ug multa nga mokantidad og P50 mil nga moral damages ug laing P25 mil nga exemplary damages.

 Nasayran nga usa ka 15-anyos nga babaye mialegar nga niadtong Marso 2, 2001 si Lim midala kaniya sa panimalay niini sa D. Jakosalem ning siyudad sa Sugbu kay gitanyagan kini og trabaho.

 Apan Mibalibad ang dalagita sa dihang nahibaw-an niini nga ang iyang trabaho mao ang pag-entertain sa mga kustomer sa bar, inay nga papaulion gisulod na hinuon siya niini sa usa ka kwarto, gitrangkahan ug gipasudlan og mga lalaki nga kustomer kinsa pugsanong nipahimulos sa iyang pagka-babaye.

 Nakahigayon lamang siya sa paggawas dihang gi-take out siya sa usa ka kustomer kinsa mihatag kaniya og usa ka gatos ka pesos human siya pahimusli.

Ang biktima migamit sa maong kwarta pagsakay og taxi ug nagpahatud sa barangay hall sa Kamagayan ug nagpatabang aron masikop sa kapolisan si Lim.

 Si Judge Yrastorza mihatag og gibug-aton sa testimonya sa biktima human nagkatuali ang mga pahayag ni Lim sa iyang pagtestimonya sa korte. – BANAT NEWS