Centcom: Central Visayas red alert sa Disyembre 26

Cebu - Ipa-ubos sa red-alert status ang tibuok Central Visayas sa Central Command karong Disyembre 26 isip kabahin sa seguridad subay sa pagsaulog sa anibersaryo sa Communist Party of the Philippines- New Peoples Army (CPP-NPA).

Kini maoy gibutyag ni Lt. Gen. Pedro Ike Inserto kagahapong adlawa atol sa iyang pag-atubang sa mga sakop sa media diin gipahigayon usab ang Media Christmas Fellowship kagahapon diha sa Central Command.

Matud pa ni Inserto nga ang pagdeklarar niya’g red-alert status gitumong aron usab ilang mapangandaman ang mga dautang laraw sa mga walhong pundok atol sa anibersaryo niini.

Gipadayag niini nga naka-estambay nang daan ang ilang mga sakop sa CentCom sa pagtubag sa bisan unsang matang sa alarma   atol sa maong adlaw.

Gibutyag niini nga 50 porsiyento sa ilang mga sakop ilang gihatagan og katungod sa Christmas break apan aduna sila'y gipangmuntar nang daang pwersa nga naka-alert lang daan atol sa pagsaulog sa Pasko.

Hinuon iyang giklaro nga ang AFP mideklarar og unilateral ceasefire ngadto sa mga rebeldeng NPA sa Disyembre 24, 25, 30 ug 31.

Hinuon ang kabahin sa mga Christmas break gihatagan usab nila og katungod ang mga local commanders sa pagdesider sa ilang kaugalingon sa pagtan-aw sa sitwasyon.

Gidugang pa niini nga bisan tuod kun ang mga rebelding NPA wala modeklarar og ceasefire apan nagtuo sila nga isip mga Kristiyano ug ang mga lider niini kanhi pari ug mga katoliko, moselebrar usab kini sa Pasko.

Hinuon bisan pa man niini, si Inserto mapasigarbuhon sa kalampusan sa Central Command sa pagpuhag sa mga rebelde dinhi sa Central Visayas diin pipila na lang ka mga sakop sa walhong pundok ang naglihok sa pipila ka lugar sa Negros ingon man sa Samar. – BANAT NEWS