Cebu - Gibaharan ni Dr. Alice Utlang, hepe sa Department of Veterinary Medicine and Fisheries (DVMF) sa Cebu City Hall nga pahamtangan og silot kadtong mga manglitsonay og baboy kinsa masakpang magbinuang pinaagi sa pagbaligya og inasal nga double dead.
Ang double dead, mao kadtong mga hayop nga namatay sa sakit o bisan unsang matang sa kamatayon nga gilitson lang gihapon aron hingkuwartahan.
Kini samtang gipagawas na ni Utlang ang listahan sa rehistradong mga litsonan sa dakbayan aron may giya ang katawhan kun asa sila mamalit og litson nga limpyo ug luwas para sa Pasko ug Bag-ong Tuig.
Nagkanayon si Utlang nga 32 ra ka mga litsonan ning dakbayan ang nakaparehistro sa iyang buhatan ug matag usa niini iyang gipabantayan og mga inspector aron sa pagsiguro nga limpyo ang ilang giluto ug walay kuyaw nga magluto kini og double dead nga mga hayop.
Sa pikas bahin gipahibawo usab sa labaw sa DVMF nga ila nang hingusgan ang pag-monitor sa ubang manglitsonay sa siyudad aron masakpan kadtong mga lechon dealer nga posibleng mopahimulos sa panahon ug moluto og double dead nga mga inasal.
Mibahad si Utlang nga ilang sakmiton kadtong mga litson nga giluto ug gibaligya sa dili lihitimo ug rehistradong litsonan sa dakbayan. – BANAT NEWS