Gwen gikiha sa IBP

Cebu - Kasong Injunction ug Temporary Restraining Order (TRO) ang gipasaka batok kang Gobernador Gwendolyn Garcia pinaagi sa mga miyembro sa Integrated Bar of the Philippines (IBP) Cebu Chapter.

Kini naggumikan sa giingong pag-abusar sa gobernador sa iyang katungdanan kalabot sa gipatuman niining pagpangolekta og parking fee sulod sa parkinganan sa compound sa Kapitolyo.

Si Atty. Elias L. Espinoza sa IBP kauban ang mga abogado nga sakop sa Cebu Laywers for Unity and Brotherhood Inc. mihangyo sa korte nga mandoan ang gobernador sa pagpahunong na sa pagpangolekta niya og parking fee sa mga sakyanang iparking diha sa parkinganan sa Kapitolyo.

Gawas niini gusto usab ni Espinosa ug mga kaubanan nga tangtangon sa gobernador ang giinstalar niining CCTV camera nga gipunting tumong sa building sa IBP Cebu Chapter.

Kauban ni Garcia nga gipangiha mao ang tanang mga sakop sa hunta provincial nga gipangulohan ni Vice Governor Gregorio Sanchez, Capitol consultant on security matters Byron Garcia ug uban pa.

Giisip nila ni Espinosa nga usa ka pag-abusar sa katungdanan ang gihimo sa gobernador ug mga kaubanang akusado   ang pagpabayad og parking fee kay usa kini ka pabug-at ngadto sa mga magbubuhis nga mo-parking sa ilang sakyanan diha sa compound sa Kapitolyo.

Samtang giisip usab sa mga kihante nga usa ka pagpangharas ang pagtaod og CCTV camera nga gipuntariya ang sumbohan niini ngadto sa buhatan sa IBP .

Ang maong kaso gipaubos sa special raffling kagahapon sa hapon ug hayan paminawon kini karong adlawa. – BANAT NEWS