'Overpricing' sa Talisay 'gimik' ra

Cebu - Usa ra ka gimik ang gihimo sa hepe sa Civil Security Unit (CSU) nga si Roger Villaver pagpabuto sa anomaliya sa overpricing sa mga ekipo sa rescue team sa dakbayan ingon man sa kagamitan sa Talisay City Hall nga iyang gisumbong ngadto sa Ombudsman.

Si Viluzminda Villarante, city accountant nga usa sa giapil ni Roger Villaver sa iyang reklamo mipakatap og suwat nga ang unod niini tubag sa mga pasangil kabahin sa overpricing.

Si Villaver miduol na ngadto ni Bise Mayor Lani Abarquez kabahin sa giingong gipaburot nga presyo sa mga ekipo sa Talisay Rescue Action Emergency Team (TREAT).

Si Abarquez sa iyang privilege speech miawhag kang Mayor Socrates Fernandez nga i-review ang mga voucher una kini mopirma.

Gawas sa mayor giawhag usab ni Abarquez ang Commission on Audit (COA) nga mosusi sa anomaliya.

Sa suwat nga mikatap gihagit niini si Villaver kinsa gitawag nga “whistleblower” nga mobutyag sa mga pangalan sa mga tawo nga giingong nakakwarta.

Si Villarante dihang nahinabi kini sa Banat News kagahapon mikwestiyon kung unsay bili sa CSU nganong mi-hire pa man og mga blue guards.

Mipasangil kining pulos ra usab gimik ang mga insidenteng may nasikop nga mga nanglili diha sa pansayan sa mga babaye sa city hall ug kadtong giingong dunay bomb threat diha sa city hall.

Matud ni Villarante nga may usa ka sakop sa CSU nga maoy mibutyag kaniya nga “gimmick” ra ang tanan ug gimugna ra sa hepe sa CSU.

Apan si Villaver sa pakighinabi niini sa Banat News kagahapon sa buntag nagkanayon nga isalig na lang niya ngadto sa Ombudsman ang reklamo nga iyang giduso kabahin sa overpricing ug aduna siya’y mga dokumento nga gigunitan pagmatuod sa iyang reklamo.

Gibutyag niini nga miduol pa siya ni Villarante aron mangayo og tabang para masulbad ang maong problema apan nahibulong na siya niini karon tungod kay midupa na kini sa maong isyu.

Si Villaver mibahad nga ikunsulta niya sa iyang abogado ang mga gikapakatap nga suwat ni Villarantre aron makahimo siya og lakang kabahin niini.

 Samtang si Vice Mayor Abarquez kagahapon mitug-an nga gilamoy na og kurapsyon ang city hall kini bisan paman nga gipanghimakak nang daan sa mayor.

 “I may be the vice mayor, but there is a limit to my power,” matud pa ni Abarquez kinsa miawhag atol sa iyang privilege speech nga kinahanglang may imbestigasyong himuon bahin niini.

Sa sitwasyon nga giatubang karon ni Villaver, gihagit ni Abarquez ang Talisay City Employees Union nga protektahan ang ilang mga miyembro ug giawhag ang ubang kawaning dunay nahibaw-ang anomalya sa pagsumbong niini.

Sa iyang bahin, si Konsehal Edward Alesna ang tsirman on laws and ethics mibutyag nga walay imbestigasyong mahitabo sanglit ang kaso gipasaka na ngadto sa Office of the Ombudsman. -Visayas. Uban sa report ni Loraine Ebisa (BANAT NEWS)