Milikay sa checkpoint 'bangga

Tungod sa paglikay sa checkpoint sa kapolisan usa ka motor ang misampak sa laing motor nga miresulta sa pagkaangol sa upat alas 10 pasado ang takna sa miaging gabii sa dalan M.L. Quezon sa barangay Maguikay, dakbayan sa Mandaue.

Ang grabeng naangol giila mao sila si Isagani Sapois, 44, Charlie Sapois, 49, nga pulos taga barangay Labogon, Felix Sontase, 41 ug Renato Hermoso nga taga Pilit, Cabancalan sa maong dakbayan.

Si SPO2 Genaro Lambayan, imbestigador sa   traffic division sa Mandaue City Police Office (MCPO) nga nahinabi sa Banat News miingon nga si Sapois nagsubay sa dalan M.L. Quezon paingon sa Talamban.

Nagsunod kini sa motorsiklo ni Hermoso ug sa paghidangat sa maong dapit may usa ka checkpoint nga gibutang sa Casuntingan Police Station 4 gipangulohan ni Sr. Insp. Rosario Ceniza.

Dihang gipahunong si Sapois wala kini manumbaling ug gipabulhot ang motorsiklo apan nawad-an kini sa kontrol ug nasampak sa nag-unang motorsiklo nga gidala ni Hermoso.

Ang mga motorsiklo nangalamba lakip na mga sakay niini ug gidala sa Vicente Sotto Memorial Medical Center.

Si SPO2 Lambayan miingon nga sa iyang pakisusi iyang nasayran nga walay rehistro, nakainom ug walay lisensya pagmaneho si Sapois maong milikay kini sa checkpoint.