CAIB nangangko'g kalampusan

Nagmalampuson ang Cebu City Anti-Indecency Board (CAIB) sa kampanya niini batok sa pornograpiya dinhi sa siyudad niining tuiga.

Kini kung ang chairman sa CAIB nga si Rene Josef Bullecer maoy pasultihon subay sa ilang gipahigayon nga mga kalihukan.

Mapasigarbuhong gipahibawo ni Bullecer nga ilang nakontrolar ang mga establisamento sa dakbayan pagpasundayag og malaw-ay nga talan-awon diha sa mga notadong mga entertainment night spots.

Gipahibawo usab ni Bullecer nga niminos na og kapin sa 50 porsiyento ang mga malaw-ay’ng basahon nga gipamaligya dinhi sa dakbayan.

Dugang ni Bullecer nga wala na usab sila makadawat og mga reklamo labot sa cybersex diha sa mga internet café sa siyudad.

 “We could say we are fairly successful in our campaign ug ato usab ni nga ma-attribute ngadto sa atong kapulisan tungod sa ilang all-out support,” sumala ni Bullecer.

Karong adlawa magtigom na usab ang mga sakop sa CAIB aron sa pagplantsa sa ilang mga gimbuhaton ug kalihukan alang sa sunod tuig.

Malaumon si Bullecer nga sila kahatagan na og igong gahin sa kagamhanan sa dakbayan niining higayuna aron mapatuman sa hingpit ang ilang mga programa.

“We are hoping nga with the leadership of acting mayor Michael Rama nga maaprubahan ang among iduso nga budget proposal for next year,” dugang ni Bullecer.

Giangkon sa CAIB chairman nga nagkuwang ang ilang gahin niining tuiga, apan kini ilang gisabot tungod usab sa kaapiki sa panudlanan sa dakbayan.