Amang snatcher tiklo

Cebu - Nasikop sa security guard sa SM City Cebu ang usa ka amang nga nanguot og cellphone sa usa estudyante nga nagkaon sa usa ka fast food restaurant sa maong tindahan niadtong Sabado sa alas 12:00 sa udto.

Si PO1 Lloyd Magdadaro sa Mabolo Police Station miila sa biktima nga mao si Ann Cahn, 23, dalaga, taga Guadalupe ning siyudad sa Sugbu ug estudyante sa usa sa kolehiyo dinhi sa dakbayan.

Samtang ang suspetsado mao si Jesrel Tirol, 20, ulitawo nga taga Guadalupe usab, ug usa ka amang.

Segon pa ni PO1 Magdadaro nga samtang nagkaon si Ann Chan sa McDonald, hilom nga miduol ang amang ug mikuot sa iyang Nokia 6630 cell phone nga balor og P 7 mil gikan sa iyang bulsa.

Wala unta makabantay ang biktima, apan ang iya nang katapad nga babaye maoy misulti kaniya hinungdan nga mihiwasa ang biktima ug mitawag kang Renante Diongzon, ang security guard sa SM kinsa misikop dayon sa suspek ug misakmit sa cell phone nga kinawat niini.

Gitanggong dayon sa kapolisan sa Mabolo ang suspetsado samtang atubangon niini ang kasong pagpangawat nga gisang-at batok kaniya sa biktima. – BANAT NEWS