Rama nasuko sa mga vendors

Cebu - Si Acting Mayor Michael Rama mipasidaan sa mga vendors sa Santo Niño sidewalk nga dili siya hagiton sa kasuko kun buot pa nilang magpadayon sa ilang panginabuhi diha sa maong lugar.

Kini samtang gipadayag ni Rama nga hapit na mahurot ang iyang pasinsya ngadto sa mga sakop sa Santo Niño Sidewalk Vendors Association (SNSVA) gumikan sa kagahi pasabton ug pag-insister sa pipila ka mga sakop sa maong kahugpungan pagpaninda sa dapit nga wala itugot kanila.

Partikular na niini ang dapit sa ganghaan sa Basilica del Santo Niño sa habig sa dalan D. Jakosalem nga mibabag na sa agianan sa mga deboto.

Matud sa acting mayor nga iya nang gipatawag ang hingtungdang mga vendors ug kini giingong misaad sa pagsunod sa ilang nasabutan.

Apan mao na lay nasayran ni Rama nga nakiglalis ug nakig-away ang mga vendors dihang gisakmit sa mga sakop sa demolition team nga sakop sa Squatters Prevention Encroachment and Elimination Division (SPEED) ang ilang mga baligya.

Ang nahitabong lamok-lamok tali sa mga sakop sa demolition team ug sa mga vendors miresulta sa pagkaangol sa pipila ka mga sakop sa duha ka habig.

 Nasayran nga ang acting mayor mipadala na og mga polis diha sa dalan D. Jakosalem ug Osmeña Boulevard nga gitahasan pagbadlong sa mga manindahay.

Una nang giinsister sa pipila ka mga sakop sa SNSVA nga gamiton nila ang eskina sa mga dalan D. Jakosalem ug Osmeña Boulevard alang sa ilang mga baligya.

Kini tungod kay sila giingong wala kahatagi og pwesto sa mga stalls nga gitukod diha sa dalan Jakosalem nga alang sa mga vendors.

Gani mibahad ang maong mga vendors dili gyud sila moundang apan mopadayon gyud silang mamaligya og imahen sa maong dapit bisan kun makapila pa sakmiton ang ilang mga baligya. – BANAT NEWS